18.05.2024 | 20:00
Ճանապարհից հետ է ընկել․ օրեր անց փրկարարները գտել են սպանված. ՏԵՍԱՆՅՈՒԹ
Ավինյանն ու Միլսը քննարկել են «Հազարամյակի մարտահրավերներ»-ի նոր համաձայնագրի հարցը
Քաղաքականություն
15.06.2018 | 14:33
Հայաստանի փոխվարչապետ Տիգրան Ավինյանն ու ՀՀ-ում ԱՄՆ դեսպան Ռիչարդ Միլսը հունիսի 14-ին տեղի ունեցած հանդիպման ընթացքում քննարկել են Հայաստանի մրցունակությունը «Հազարամյակի մարտահրավերներ» ծրագրի նոր համաձայնագրի համար: Ամերիկացի դիվանագետը խոստացել է առաջիկայում անդրադառնալ այդ հարցին:
Փոխվարչապետի գրասենյակի տեղեկացմամբ՝ ԱՄՆ դեսպանը շնորհավորել է Տիգրան Ավինյանին պաշտոնում նշանակվելու կապակցությամբ՝ նշելով, որ պատրաստ են աջակցել նոր կառավարության տնտեսական եւ քաղաքական բարեփոխումներին, եւ որ գործարար եւ ներդրումային միջավայրի բարելավումը կօգնի ներգրավել ավելի մեծ թվով ամերիկյան ընկերությունների, որոնք արդեն տեսնում են այստեղ առկա ներուժը:
Կողմերը քննարկել են երկկողմ համագործակցությանն առնչվող մի շարք հարցեր՝ ներառյալ ներդրումային եւ դրամաշնորհային ծրագրերի շարունակականությունը, հարկային եւ ենթակառուցվածքային համակարգերում խթաններ հաղորդելու անհրաժեշտությունը:
ԱՄՆ դեսպանը կարեւորել է նաեւ Լիդիան-Արմենիա ընկերության՝ որպես միջազգային խոշոր ներդրումային ծրագրի գործունեության շարունակականությունը: Փոխվարչապետը վստահեցրել է, որ նոր կառավարությունն անաչառ ուսումնասիրություններ է կատարելու՝ վեր հանելու Հայաստանում հանքարդյունաբերական ոլորտի ընդհանուր պատկերն ու համապատասխանությունը միջազգային եւ պետական ստանդարտներին, եւ որ այդ ստուգումները պետք է կազմակերպվեն բոլոր ձեռնարկություններում՝ թափանցիկ ու բոլոր կողմերի համար արժանահավատ ձեւաչափով:
