23.06.2026 | 14:53
Բաքուն ԱՄՆ Կոնգրեսում Հայաստանի կողմից, իբր, «ադրբեջանցիների էթնիկ զտումների» մասին համաժողով է նախաձեռնել
ԵՄ-ն վերանայում է իր ֆինանսական քաղաքականությունը Թուրքիայի նկատմամբ
Քաղաքականություն
15.06.2018 | 13:34
Եվրամիության հանձնաժողովը նոր երկարաժամկետ բյուջեի նախագծով որոշել է այսուհետև առանձին ֆինանսական օգնություն չհատկացնել ԵՄ անդամության թեկնածու ամեն երկրի համար. տեղեկացնում է ermenihaber-ը:
Որոշումն ընդունվել է 2021-2027թթ. ֆինանսական ժամանակահատվածի բյուջեն հստակեցնելիս: Որպես որոշման հիմնավորում՝ մատնանշվում են ԵՄ-Թուրքիա հարաբերություններում առկա խնդիրները:
ԵՄ-ի հայտարարության մեջ նշվում է, որ 2021-2027թթ բյուջեն նախատեսում է, որ թեկնածու երկրներին տրամադրվող օգնությունը կբաշխվի ոչ թե առանձին երկրների միջև, այլ բոլոր թեկնածու երկրների համար կհաստատվի ընդհանուր օգնության չափ: Ըստ նոր բյուջեի՝ 2021-2027թթ. ԵՄ թեկնածու 5 երկրի՝ Թուրքիայի, Անդորրայի, Մակեդոնիայի, Մոնտենեգրոյի և Սերբիայի համար առանձնացվել է 14 միլիարդ 500 միլիոն եվրո:
ԵՄ հարևանության և ընդլայնման հարցերով հանձնակատար Յոհանես Հանը հայտարարել է, որ ԵՄ-ի քաղաքականության թիրախում լինելու են արևմտաբալկանյան երկրները: Նա նաև ընդգծել է, որ ԵՄ-ի ֆինանսական միջոցները այսուհետև ոչ թե ըստ թեկնածու երկրների են բաշխելու, այլ՝ ԵՄ-ի համար կարևորություն ունեցող հարցերի: Ըստ Հանի՝ Եվրամիության այս քաղաքականությունը կարող է որոշակի մրցակցություն ստեղծել թեկնածու երկրների միջև ԵՄ չափանիշներին համապատասխանելու տեսանկյունից:
Նշենք, որ նախորդ բյուջեի հաստատման ժամանակ Թուրքիային, որպես ԵՄ թեկնածու երկրի, պետք է հատկացվեր 4 միլիարդ 450 միլիոն եվրո: Սակայն մինչև այժմ այդ գումարից Թուրքիան տրամադրվել է ընդամենը 315 միլիոնը: ԵՄ հանձնաժողովը ֆինանսական օժանդակության կրճատումը հիմնավորել է Թուրքիայում ժողովրդավարության և մարդու իրավունքների ոլորտում նկատվող հետընթացով:
