Լեմկինի ցեղասպանության կանխարգելման ինստիտուտը ցնցված է, որ BBC HARDtalk-ի հաղորդավարը ցեղասպանությունն առաջարկել է որպես Արցախի հայերի առջև ծառացած «իրատեսական տարբերակներից մեկը»

Լեմկինի ցեղասպանության կանխարգելման ինստիտուտը ցնցված և սարսափած է, որ BBC HARDtalk-ի հաղորդավար Սթիվեն Սաքուրը 2023 թվականի հունվարի 23-ին Արցախի պետնախարար Ռուբեն Վարդանյանի հետ հարցազրույցի ժամանակ ցեղասպանությունն առաջարկել է որպես Արցախի հայերի առջև ծառացած երկու «իրատեսական տարբերակներից» մեկը»։ Այս մասին ասված է ինստիտուտի տարածած հայտարարության մեջ:

Հայտարարության տեքստում մեջբերվում է հարցազրույցի այն հատվածը, որտեղ անդրադառնալով Ադրբեջանի նախագահ Իլհամ Ալիևի բռնատիրական ռեժիմի կողմից Արցախի անօրինական 44-օրյա շրջափակմանը՝ Սաքուրը Վարդանյանին հարցրել է. «Դուք վերահսկում եք մի փոքրիկ անկլավ, որն այժմ գտնվում է տնտեսական շրջափակման մեջ, և թվում է, թե ձեր միակ իրատեսական տարբերակը կա՛մ Ադրբեջանի հետ քաղաքական գործարք մշակելն է, կա՛մ ժողովուրդը՝ Լեռնային Ղարաբաղի հայ համայնքը, պետք է որոշի, որ սա այլևս կայուն չէ և լքի տարածքը։ Այսպիսով, ո՞ր մեկն է լինելու՝ քաղաքական գործարք, թե՞ հեռանալ»։

«Ինչպես Լեմկինի ինստիտուտը բազմիցս նշել է իր ահազանգերում և հայտարարություններում՝ մարդկանց մահվան սպառնալիքով ստիպել լքել իրենց հողը՝ ցեղասպանության ձև է:

Լեմկինի ինստիտուտը զարմացած է, որ ստիպված է մատնանշել, որ ցեղասպանությունը երբեք չպետք է առաջարկվի վտանգված ժողովուրդներին՝ որպես ապագա հնարավոր «իրատեսական տարբերակ»։ Ցեղասպանությամբ սպառնացած մարդիկ առերեսվում են ընտրության՝ առանց ընտրության։ Եթե հայերը ստիպված լինեն հեռանալ իրենց տներից Ադրբեջանի սպառնալիքների ներքո, «դա իրատեսական տարբերակ չէ», դա ցեղասպանություն է։ Սաքուրի կողմից հարցի ձևակերպումը նրան դնում է հանցագործի դիրքում, որն այս դեպքում Իլհամ Ալիևն է։ Արցախը ներդնելով ֆանտաստիկ սցենարի մեջ, որտեղ հնարավոր են քաղաքական բանակցություններ ներկայիս հակահայ, ցեղասպան ադրբեջանական վարչակարգի հետ, Սաքուրը ներգրավվում է ցեղասպանության ոչ այնքան նուրբ ժխտման մեջ և նույնիսկ մեղադրում է զոհին»,- ասված է ինստիտուտի տարածած հայտարարության մեջ:

Տաթև Ֆռանգյան