Քաղաքապետ դառնալու համար քաղաքական ուղի է պետք անցնել, ես այն չեմ անցել․ Դոն Պիպոն իր՝ Էջմիածնի քաղաքապետ դառնալու մասին․ ՏԵՍԱՆՅՈՒԹ

Արթուր Ասատրյանը, որ հանրությանն առավել հայտնի է Դոն Պիպո մականվամբ, էջմիածնում կազմակերպված հանրահավաքի ժամանակ, լրագրողների հետ զրույցում, պատասխանելով հարցին՝ արդյոք պատրաստվում է դառնալ Էջմիածնի քաղաքապետ, եթե  Կարեն Գրիգորյանը հրաժարական ներկայացնի, նշեց.  «Քաղաքապետ դառնալու համար քաղաքական ուղի է պետք է անցնել, քաղաքագետ է պետք լինել, ես չեմ»։ 

Խոսելով Մանվել Գրիգորյանի հետ իր հարաբերությունների մասին՝ Արթուր Ասատրյանը նկատեց, որ Մանվել Գրիգորյանին ճանաչել է որպես  խեղճ ժողովրդին կեղեքող մարդ: «Հազարավոր մարդիկ եկել են մեր տուն, բողոքել  նրանից,  բայց քանի որ նրա հետևում կանգնած է եղել պետական ապարատը այն ժամանակ մենք ոչ մի բան չէինք կարող անել»,- ասաց Արթուր Ասատրյանը։

Հարցին՝  արդոք Վլադիմիր Գասպարյանին զանգահարել են և խնդրել, որ իրեն չձերբակալեն, Արթուր Ասատրյանը պատասխանեց․ «Պարոն Գասպարյանն էդ տղան չէր, որ նրան ինչ որ մեկը զանգեր ասեր թողեք, կամ մի թողեք, իսկ երկրորդը՝ ժամանակն ամեն ինչ ցույց կտա»։  

Վերջինս նկատեց՝ քանի որ այժմ հեռացել են նախկին իշխանություններն ու համակարգը, ապա Մանվել Գրիգորյանը ևս պետք է հետևի նրանց։ 

Հիշեցնենք, որ Ազատ էջմիածնեցիները նախաձեռնել են հանրահավաք՝ պահանջելով տարիներ շարունակ Էջմիածինը բռնապետության վերածած Գրիգորյանների գործունեության օրենքի դաշտ տեղափոխում, քաղաքապետ Կարեն Գրիգորյանի հրաժարական։

Նշենք, որ Արթուր Ասատրյանը վերադարձել է Էջմիածին և որոշել սատարել հարազատ քաղաքի բնակիչներին՝ ազատվելու իրենց համար ոչ նախընտրելի քաղաքի ղեկավարից՝ Կարեն Գրիգորյանից։ 

Մանրամասները՝ տեսանյութում։