Իմացանք՝ «Ֆլեշ» կազմակերպությունն է հաղթել, զարմացանք. Սերժ Սարգսյանի գործով վկան հարցաքննվեց․ ՏԵՍԱՆՅՈՒԹ

Երևանի ընդհանուր իրավասության դատարանում՝ դատավոր Վահե Միսակյանի նախագահությամբ, այսօր՝ հունվարի 26-ին ընթանում է Սերժ Սարգսյանի գործով հերթական դատական նիստը։

Նիստին ներկա էր Երրորդ նախագահ Սերժ Սարգսյանը՝ իր փաստաբանների հետ, ներկա էր նաև այս գործով մյուս մեղադրյալը՝ «Ֆլեշ» ընկերության սեփականատեր Բարսեղ Բեգլարյանը:

Հարցաքննվեցին գործով երկու վկաներ Սևան Քոչարյանը և Եղիշե Վարդանյանը: Դատարանում վկաների տված ցուցմունքներում որոշ հակասություններ կային նախաքննության ընթացքում տված ցուցմունքներից:

Եղիշե Վարդանյանը, ով ներկայացնում էր «Սովրանիե» ընկերությունը, անդրադարձավ իր և Սևան Քոչարյանի՝ դիզվառելիք ձեռք բերելու և իրացնելու բիզնես գործունեությանը։

Նա նշեց, որ դիզվառելիքի սուբսիդավորման պետական ծրագրին մասնակցելու համար փաստաթղթերի փաթեթ են ներկայացրել գյուղնախարարություն։ «Մեզ հարցրել են՝ դիզվառելիք կարո՞ղ եք ներկրել, ասել ենք՝ այո։ Ասել են՝ դե գնային առաջարկ արեք։ Փաստաթղթերը ներկայացրել ենք»,- ասաց վկան․․․ Հետո իմացանք՝ «Ֆլեշ» կազմակերպությունն արդեն դիզվառելիք է բաժանում, զարմացանք.․․․ Չենք իմացել՝ ինչու մենք չենք հաղթել»։

Նշենք, որ գյուղացիներին տրամադրվող դիզվառելիքի գնման մրցույթում հաղթել էր ամենաբարձր գինն առաջարկած «Ֆլեշ» ընկերությունը:

Հիշեցնենք՝ ըստ մեղադրական եզրակացության՝ Սերժ Սարգսյանի կազմակերպմամբ և Բարսեղ Բեգլարյանի դրդմամբ, Սամվել Գալստյանի ու Գևորգ Հարությունյանի օժանդակությամբ, Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամ:

Սերժ Սարգսյանին մեղադրանք է առաջադրվել ՀՀ ՔՕ 38-179-րդ հոդվածի 3-րդ մասի 1-ին կետով՝ առանձնապես խոշոր չափերով յուրացնելը կամ վատնելը։ Երրորդ նախագահն իրեն առաջադրված մեղադրանքը չի ընդունում, նրա պաշտպաններն էլ այս գործընթացը որակում են որպես «քաղաքական հետապնդում»։

Նշենք՝ կորոնավիրուսի հետևանքով մահացել են գործով ամբաստանյալներ Սերգո Կարապետյանը և Սամվել Գալստյանը։ Սերժ Սարգսյանի մեղադրանքի հիմքում հենց Սերգո Կարապետյանի ցուցմունքն էր։

Մանրամասները՝ տեսանյութում։