18.12.2025 | 21:39
Երևանում և 9 մարզում էլեկտրաէներգիայի անջատումներ կլինեն
«Մալաթիա» տոնավաճառը փետրվարից կփակվի․ շուրջ 600 մարդ անգործ կմնա․ ՏԵՍԱՆՅՈւԹ
Քաղաքականություն
25.01.2023 | 21:25
Վրեժ Կարապետյանն արդեն 25 տարի աշխատում է Երևանի «Մալաթիա» տոնավաճառում․ մանկական հագուստի տաղավար ունի։ Այսօր նա և մյուս առևտրականները տեղեկացել են, որ տոնավաճառը փետրվարի 1-ից այլևս չի գործելու։ Քաղաքաշինության, տեխնիկական և հրդեհային անվտանգության տեսչական մարմինը դեռ 2021-ի հուլիսին ստուգումներ էր իրականացրել «Մալաթիա» տոնավաճառում, արձանագրել շուրջ երկու տասնյակ խախտումներ, տնտեսվարողին տուգանել 30,000 դրամով։ Դրանք վերացնելու համար տոնավաճառի տնօրինությանը ժամանակ էր տրվել։
«Տուգանել են, վճարել ենք և սկսել ենք վերացնել խախտումները»,- ասում է «Ռաֆայել-Տաթև» ՍՊԸ բաժնետեր-տնօրեն Սամվել Ավետիսյանը։
2022-ի հոկտեմբերին տնտեսվարողը խախտումների մեծ մասը վերացնելու մասին գրություն է ուղարկել տեսչական մարմնին և մյուս խախատումները վերացնելու համար ժամանակ խնդրել՝ առանց տոնավաճառի գործունեությունը դադարեցնելու։
«Տեսչական մարմնի մասնագետները տեղում ուսումնասիրություն են կատարել և պարզել, որ կատարած աշխատանքների որակը չի համապատաասխանում նորմատիվներին»,- ասում է ՔՏՀԱ տեսչական մարմնի ղեկավարի տեղակալ Արազ Պապիկյանը։
«Ռաֆայել-Տաթև» ՍՊԸ բաժնետեր-տնօրեն Սամվել Ավետիսյանը, սակայն, պնդում է, որ իրենց տոնավաճառում այս պահին ընդամենը 3 խախտում կա, որոնք այնքան առանցքային չեն, որպեսզի հիմք հանդիսանան տոնավաճառը փակելու համար։
Տեսչական մարմնի ղեկավարի տեղակալ Արազ Պապիկյանն էլ հակադարձում է՝ դրանք հենց այն խախտումներ են, որոնք բավարար հիմք են գործունեությունը կասեցնելու համար, և եթե նախկինում տնտեսվարողին ժամանակ էր տրվում թերությունները վերացնելու համար, ապա հիմա հրդեհավտանգ իրավիճակներ արձանագրելու դեպքում անմիջապես հաջորդում է գործունեությունը կասեցնելու որոշումը։
Հակահրդեհային ինքնաշխատ համակարգ, հրդեհի ազդանշանման համակարգ, կրակմարիչներ, հրդեհաշիջման համակարգեր, հակահրդեհային ավազաններ, հիդրանտներ, դեպի դուրս բացվող դռներ, տարհանման պլան և այլն․ սրանք այն հիմնական նորմերն են, որոնք խիստ պարտադիր են առևտրի խոշոր կենտրոնների համար։ Տնօրենն ասում է՝ թվարկվածներից տոնավաճառում չկա միայն հակահրդեհային ինքնաշխատ համակարգը։
Տոնավաճառի շուրջ 600 աշխատակիցներ, ստացվում է, փետրվարի 1-ից կորցնելու են աշխատանքը։ Առևտրականները Factor TV-ի հետ զրույցում դժգոհում են որոշումից, հարցնում՝ եթե փակվի տոնավաճառը, ի՞նչ են անելու, ինչպե՞ս են ընտանիք պահելու։
ՔՏՀԱ տեսչական մարմնի ղեկավարի տեղակալն ասում է՝ «Սուրմալու» տոնավաճառում 16 մարդու կյանք խլած ողբերգական դեպքից հետո վերահսկողությունը տասնապատիկ խստացվել է և տնտեսվարողի հետ փոխզիջման չեն գնում։ Ազատ գյուղում տեղակայված զինվորական կացարանում 15 զինվորի մահվան պատճառ դարձած հրդեհից հետո Կառավարության նիստի ժամանակ վարչապետ Նիկոլ Փաշինյանն էր այդպիսի հրահանգ տվել։
«Սուրմալու»-ի ողբերգությունից հետո դեռ որևէ մեկը քրեական պատասխանատվության չի ենթարկվել։ Հիշեցնենք՝ դեռ 2021 թվականին տեսչական մարմինը ստուգումներ էր իրականացրել «Սուրմալու» առևտրի կենտրոնում և շուրջ 2 տասնյակ խախտումներ արձանագրել, ղեկավարությանը տուգանել 50 հազար դրամով և կարգադրագիր տվել, որ մինչև տարեվերջ վերացնի խախտումները։ Պայթյունից հետո վերստուգում իրականացվել է հարևանությամբ գործող «Փեթակ» առևտրի կենտրոնում, որի ժամանակ հայտնաբերել են խախտումներ և կասեցման որոշում է տրվել։ Հետո տնտեսվարողը պաշտոնապես տեսչական մարմնին ներկայացրել է, որ մեծ ծավալի աշխատանք է կատարել և վերացրել է խախտումները։ Վերստուգումների ժամանակ մասնագետներն արձանագրել են, որ չկա հրդեհասպառնալից իրավիճակ, որոշվել է թույլատրել շարունակել գործունեությունը։
Տեսչական մարմնից ասում են՝ առաջիկայում այլ խոշոր առևտրի կենտրոնների գործունեությունը դադարեցնելու մասին կհայտարարվի։ Եթե տնտեսվարողը վերացնի բոլոր խախտումները, պաշտոնապես կարող է դիմել տեսչական մարմնին և, վերստուգումների ժամանակ խախտումներ չհայտնաբերելու դեպքում, առևտրի կենտրոնի գործունեությունը կվերսկսվի։
Մանրամասները՝ տեսանյութում։
Արփի Հակոբյան
