11.01.2025 | 13:00
Հրդեհ Նոյեմբերյան քաղաքում․ այրվել է խանութի 3 տաղավար
Պետական պարտքը 1 տարում աճել է 15 %-ով․ արտաքին պարտքը նվազել է
Տնտեսություն
24.01.2023 | 11:47
ՀՀ պետական պարտքը 2022 թվականի դեկտեմբերի վերջի դրությամբ կազմել է 10 մլրդ 637 մլն դոլար՝ 1 մլրդ 412 մլ դրամով կամ շուրջ 15 %-ով ավելի նախորդ տարվա նույն ամսվա համեմատ։ Այս մասին տեղեկանում ենք պետական վիճակագրական ծառայության հրապարակած տվյալներից։
Պետական պարտքն իր մեջ ներառում է ՀՀ Կառավարության և ՀՀ Կենտրոնական բանկի պարտքը։ Մեծ մասը կազմում է Կառավարության պարտքը։ Այսպես․ պետական պարտքի 10 մլրդ 86 մլն դոլարը Կառավարության պարտքն է, 551,3 մլն դոլարը՝ ԿԲ-ի պարտքը։
Կառավարության պարտքն իր հերթին ներառում է արտաքին պարտքն ու ներքին պարտքը։ Արտաքին պարտքը միջազգային կազմակերպություններից վերցված վարկերն ու փոխառություններն են, ներքին պարտքը՝ ներքին վարկեր, փոխառություններ, ռեզիդենտների կողմից ձեռքբերված պետական գանձապետական պարտատոմսեր, արտարժույթային պետական պարտատոմսեր։
2021 թվականի դեկտեմբերին Կառավարության արտաքին պարտքը կազմել է 6 մլրդ 190 մլն դոլար։ 2022 թվականի դեկտեմբերին այն նվազել է՝ հասնելով 5 մլրդ 899 մլն դոլարի։ Այս նվազման մեջ մեծ դեր ունի դոլարի նկատմամբ դրամի արժևորումը, քանի որ ՀՀ արտաքին պարտքը սպասարկվում է արտարժույթով։
ՀՀ պետական պարտքն աճել է մեծապես ներքին պարտքի հաշվին։ Եթե 2021 թվականի դեկտեմբերին Կառավարության ներքին պարտքը կազմել է 2 մլրդ 577 մլն դոլար, ապա 1 տարի անց՝ 2022 թվականի դեկտեմբերին այն կազմել է 4 մլրդ 186 մլն դոլար։
Կենտրոնական բանկի պարտքը աճել է 93,6 մլն դոլարով՝ 2021-ի դեկտեմբերի 457,7 մլն դոլարի փոխարեն այն կազմել է 551,3 մլն դոլար։
Հիշեցնենք, որ նախորդ տարեվերջին ՀՀ Ֆինանսների նախարար Տիգրան Խաչատրյանը Ազգային ժողովում, անդրադառնալով պետական պարտքի ցուցանիշներին, նշել էր, որ նախատեսվում է պետական պարտքը նախորդ տարվա 60,3 տոկոս մակարդակից նվազեցնել մինչև 50 տոկոսը չգերազանցող մակարդակի։ Իսկ 2023 թ–ի վերջին, ֆինանսների նախարարության կանխատեսմամբ, պետական պարտքը ՀՆԱ–ի նկատմամբ կնվազի մինչև 49 տոկոս։
Անժելա Պողոսյան
