Լավրովն ասաց՝ միջանցքը կբացվի, բայց չեղավ․ ԼՂ-ի իշխանությունն Ադրբեջանի հետ ի՞նչ է բանակցում․ Արտաշես Խալաթյան․ ՏԵՍԱՆՅՈւԹ

Ադրբեջանն իր ընկալմամբ լուծելով Արցախի հարցը ռազմաքաղաքական մակարդակում՝ ձեռնամուխ է եղել Արցախի հիմնական տնտեսական ակտիվների նկատմամբ որոշակի էքսպանսիայի։ Այս գնահատականն ունի Արցախի՝ 40-ից ավելի օր շարունակվող շրջափակման մասին «Հանուն Հանրապետության» կուսակցության անդամ, իրավաբան Արտաշես Խալաթյանը։

«Եթե տրամաբանորեն ինքը համարում է, որ Արցախն Ադրբեջանի տարածք է, հետևաբար՝ այսօր Ադրբեջանը փորձում է մխրճվել Արցախի բնական պաշարների շահագործման ոլորտ։ Այստեղ կարևոր է հիշել, որ այդ ոլորտն Արցախի և Ռուսաստանի տնտեսաքաղաքական էլիտայի մենաշնորհային շահերի տիրույթում է գտնվում»,- նշեց Արտաշես Խալաթյանը։

Որոշ ժամանակ առաջ Սերգեյ Լավրովը հայտարարեց, որ մոտ ժամանակներս Լաչինի միջանցքի շուրջ հարցը կկարգավորվի։ Նա հիշեցրել էր, որ Ադրբեջանի և ԼՂ-ի ներկայացուցիչները հանդիպել են՝ Արայիկ Հարությունյանը և Ադրբեջանի ԳՇ-ի պետի տեղակալը ԼՂ-ում ռուսական ռազմաբազայում։

«Կարծում եմ, որ մոտ ապագայում հարցը կկարգավորվի»,- ասել էր Լավրովը։

Սակայն հայկական կողմը չի համաձայնել Բաքվի պահանջներին։ Ինչո՞ւ Լավրովի խոսքը չկատարվեց, նա այնքան վստահ էր խոսում բացման մասին։ Ըստ Խալաթյանի՝ Ադրբեջանն ուզում է ռեալ շահաբաժին, ռեալ մասնակցություն հանքերի շահագործմանը՝ ինչը հարվածում է որոշ անձանց շահերին․ «Եթե մենք համաձայնվում ենք դրան, նշանակում է, որ մենք լեգիտիմացնում ենք Ադրբեջանի հավակնությունները և նկրտումները Արցախի բնական պաշարների նկատմամբ։ Դա կնշանակի՝ լեգիտիմացում Ադրբեջանի կողմից Արցախի նկատմամբ քաղաքական պաշարների լեգիտիմացում։ Այստեղ է, որ թաքնված է շան գլուխը»։

Հիշեցնելով, որ այդպես էլ չիրագործվեց Սերգեյ Լավրովի՝ Լաչինի միջանցքը շուտով բացվելու խոստումը, Արտաշես Խալաթյանը պահանջ է դնում նաև Արցախի իշխանությունների առաջ՝ հանրությանը բաց ասել, թե ինչ են բանակցում Ադրբեջանի հետ, և որոնք են Բաքվի իրական պահանջները։

Հարցազրույցն ամբողջությամբ՝ տեսանյութում։

Ռոբերտ Անանյան