17.05.2026 | 19:17
«Սուրբ Հովհաննես» մատուռ բարձրացող սարալանջին քաղաքացին վնասել է ոտքը․ փրկարարներն են օգնության հասել
Անկարան «քիչ հավանական է» համարում ՆԱՏՕ-ին Շվեդիայի անդամակցության հայտի վավերացումը՝ Ղուրանն այրելու միջադեպից հետո
Քաղաքականություն
23.01.2023 | 20:08
Դատելով այն ամենից, թե ինչպես են գործերն ընթանում Ստոկհոլմում, Անկարան երբեք չի վավերացնի ՆԱՏՕ-ին միանալու՝ Շվեդիայի հայտը։ Այս մասին հայտարարել է Թուրքիայի իշխող «Արդարություն և զարգացում» կուսակցության փոխնախագահ Նուման Քուրթուլմուշը, գրում է Daily Sabah-ը։
«Այս միջադեպը ևս մեկ անգամ ցույց տվեց, որ Շվեդիան չի հրաժարվել ահաբեկչությանն աջակցելուց»,- Թուրքիայի հյուսիսային Սամսուն նահանգում լրագրողների հետ զրույցում ասել է Քուրթուլմուշը։
Նշենք, որ ԱԶԿ պաշտոնյան նկատի ունի Շվեդիայի մայրաքաղաքում տեղի ունեցած միջադեպը, երբ դանիացի հակաիսլամիստ ակտիվիստ Ռասմուս Փալուդանը Թուրքիայի դեսպանատան դիմաց այրել է մահմեդականների Սուրբ գրքի պատճենը և ատելությամբ լցված ելույթով հանդես եկել։
Քուրթուլմուշի խոսքով՝ Թուրքիան ցանկանում է, որ յուրաքանչյուր խնդիր լուծվի դիվանագիտական ճանապարհով և «բազմիցս բացահայտ արտահայտել է իր դիրքորոշումը ՆԱՏՕ-ին Շվեդիայի և Ֆինլանդիայի անդամակցության գործընթացի վերաբերյալ»։
«Այդքան էլ դժվար չէ ահաբեկիչներին Թուրքիային արտահանձնելն ու նախագահ Էրդողանի դեմ ուղղված հարձակումները կանխելը, քանի դեռ ընտրություններին շատ քիչ ժամանակ է մնացել։ Մի կողմից՝ նրանք շարունակում են բանակցել մեզ հետ, մյուս կողմից՝ չեն ցանկանում վերջ տալ ահաբեկչության հետ իրենց սերտ հարաբերություններին։ Ակնհայտ է, որ այս տեմպերով ՆԱՏՕ-ին Շվեդիայի անդամակցության հայտը երբեք չի հաստատվի Թուրքիայի կողմից, որն ակնկալում է, որ Շվեդիան կկատարի իր ստանձնած պարտավորությունները»,- ասել է Քուրթուլմուշը:
Հավելենք, որ ավելի վաղ էլ Ստոկհոլմում բողոքի ակցիա էր անցկացվել, որի մասնակիցները կախել էին Թուրքիայի նախագահ Ռեջեփ Թայիփ Էրդողանի խամաճիկը։ Այդ միջադեպերն ավելի են լարել Թուրքիայի ու Շվեդիայի հարաբերությունները։
Էմմա Չոբանյան
