14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ուկրաինային Leopard տանկեր փոխանցելու՝ Գերմանիայի հապաղումը զայրացրել է Վաշինգտոնին․ Süddeutsche Zeitung
Քաղաքականություն
23.01.2023 | 12:56
Գերմանական Süddeutsche Zeitung պարբերականը, հղում անելով իր աղբյուրներին, հայտնում է, որ ԱՄՆ-ին խիստ զայրացրել են Բեռլինի տատանումները՝ կապված Leopard 2 տանկերն Ուկրաինային փոխանցելու հետ, գրում է BBC-ի ռուսական ծառայությունը։
ԱՄՆ-ը հույս է ունեցել, որ Ռամշտայնում Ուկրաինայի դաշմակիցների հանդիպմանն այդ որոշումը կընդունվի։
«Սպիտակ տունը հաղորդակցվել է կանցլերի գրասենյակի հետ, շփվել է անսովոր կոշտ տոնով։ Վաշինգտոնն ակնհայտ զայրացած է, որ դաշնային կառավարությունը տանկերի մատակարարումը կապել է նախապայմանների հետ»,- գրում է պարբերականը։
Süddeutsche Zeitung-ի տեղեկություններով՝ ԱՄՆ նախագահի Ազգային անվտանգության հարցերով խորհրդական Ջեյք Սալիվանը Գերմանիայի կանցլերի խորհրդական Յենս Պլետների հետ հեռախոսազրույցում կտրուկ է խոսել Բեռլինի պահվածքի մասին, իսկ ահա Ռամշտայնի հանդիպման ժամանակ լարված մթնոլորտում է անցել ԱՄՆ-ի ու Գերմանիայի պատվիրակությունների հանդիպումը։
Ռամշտայնի հանդիպումից առաջ մամուլում տեղեկություններ էին շրջանառվում, որ Գերմանիայի կանցլեր Օլաֆ Շոլցը պատրաստ է Leopards 2-ի տեղափոխման թույլտվություն տալ միայն այն բանից հետո, երբ ԱՄՆ-ը համաձայնի Ուկրաինային տալ իր «Աբրամս» տանկերը։
ԱՄՆ-ը հայտարարել է, որ Գերմանիայի հետ նման նախապայման չի քննարկվել, իսկ «Աբրամս»-ները չեն ցանկանում փոխանցել Ուկրաինային, քանի որ դրանք չափազանց թանկ են և դժվար են շահագործվում։
Էմմա Չոբանյան
