Շուտով Թբիլիսիի հայկական թատրոնը նորակառույց շենքում կընդունի իր հանդիսատեսին

Թբիլիսիի Պետրոս Ադամյանի անվան պետական հայկական դրամատիկական թատրոնը նորակառույց շենքում իր հանդիսատեսին կընդունի՝ կամ մայիսին, կամ սեպտեմբերին:

Թատրոնի գեղարվեստական ​​ղեկավար Արմեն Բայանդուրյանը Jnews-ի հետ զրույցում ասաց.

«Մենք մտել ենք շենք, աշխատանքներն արդեն ընթացքի մեջ են: Ներքին հարդարման աշխատանքներ են տարվում: Դերասանական կազմը փորձեր է անում, այսինքն՝ թատերախումբը վերադարձել է տուն, պատրաստվում ենք բացմանը, եթե մայիսին չհասցրեցինք, ապա սեպտեմբերին կանենք: Իհարկե, ներկայացումներ լինում են, օրինակ. նոր տարվա ներկայացումներ ենք խաղում Քվեմո Քարթլիում, պատրաստվում ենք մանկական ներկայացումով Ախալցիխեի հանդիսատեսին ներկայանալ, Հայաստանում ենք եղել, իսկ մարտին պատրաստվում ենք Հնդկաստանում թատերական փառատոնին մասնակցել»:

Պետրոս Ադամյանի անվան պետական հայկական դրամատիկական թատրոնը 167 տարեկան է։ Այն հիմնադրվել է 1856-ին։ Հավլաբարում գտնվող ներկայիս շենքում թատրոնը սկսել է գործել 1936-ից: 1921 թվականի մայիսի 1-ին թատերախումբը ստացել է պետական թատրոնի կարգավիճակ և կոչվել Ստեփան Շահումյանի անվամբ, սակայն 1991-ին թատրոնը վերանվանվել է, և մինչև օրս հանդես է գալիս որպես Թբիլիսիի Պետրոս Ադամյանի անվան պետական հայկական դրամատիկական թատրոն անվամբ:

Նշենք, որ թատրոնի շենքի վերակառուցման ծրագիրն իրականացվում է «Քարթու» հիմնադրամի միջոցներով, որը պատկանում է Բիձինա Իվանիշվիլին: «Քարթու» հիմնադրամը հանրապետությունում շուրջ 900 հուշարձան է վերանորոգել: