Պատկերասրահները վատ վիճակում են, բայց դիրքերն ավելի կարևոր են. Շանթ Կարապետյան. ՏԵՍԱՆՅՈՒԹ

«Պատերազմը փոխում է արվեստի մարդուն, նրա մտքերը, փոխվում է նրա ստեղծածը: Դա արտահայտվում է նաև կտավների մեջ, քանի որ նկարները կյանքի խտացված տարբերակներն են: Չորս կտավների շարք եմ նվիրել պատերազմին: Առհասարակ, կարծում եմ` արվեստի մարդը մյուսներին պետք է ուղղորդի այն թեմաների կողմը, որոնք նրանք անզեն աչքով չեն նկատում: Ուզում եմ մեր դարդը արվեստի զարգացումը լինի, ոչ թե սահմանում կատարվողը»,- Factor TV-ի հետ զրույցում նման տեսակետ է հայտնում նկարիչ ShakArt-ը` Շանթ Կարապետյանը, ով մասնակցել է 44-օրյա պատերազմին և իր նկարները բաժանում է երկու մասի` ստեղծված պատերազմից առաջ և հետո:

Շանթը խոսում է իր ոլորտի խնդիրների մասին: Նա նշում է, որ պետությունը պետք է աջակցի տաղանդավոր մարդկանց և ատամներով պահի նրանց. «Կուզեմ` պետությունն աջակցի նկարչին, օրինակ, ցուցահանդես կազմակերպելու հարցում, բայց միևնույն ժամանակ մենք ունենք շատ մեծ խնդիրներ: Կուզեմ պետությունն ինձ չաջակցի, բայց սահմանի խնդիրները լուծի»,-ասում է նա:

Շանթը նախորդ տարվա ավարտին ցուցահանդես ունեցավ Իտալիայի Վենետիկ քաղաքում: Մինչ այդ էլ ցուցահանդես էր ունեցել Երևանում և բախվել լուրջ խնդիրների, մինչև որ գտել էր իր համար հարմար տարբերակը. «Մեր ցուցասրահներից շատերը բավական վատ վիճակում են, պետք է լուծել այդ խնդիրը: Բայց էլի եմ ասում` թող մեր ցուցասրահները մնան վատ վիճակում, բայց կահավորվեն դիրքերը»:

Մանրամասները` տեսանյութում:

Աննա Բաբաջանյան