Վտանգավո՛ր է վարչապետի այդ խոսքը․ կապիտուլյացիայից են խոսում հետդ, ո՛չ խաղաղությունից, որ հանձնես պետականությունդ․ Հրաչյա Արզումանյան. ՏԵՍԱՆՅՈՒԹ

Արարատ Միրզոյանն օրերս ասաց՝ մեկ ամիս առաջ Ադրբեջանին են ուղարկել խաղաղության պայմանագրի հայկական խմբագրությամբ տարբերակը, սակայն արձագանք չի ստացվել։ Եթե չհաշվենք այն, որ Ադրբեջանը սրել է վիճակը՝ փակելով Լաչինի միջանցքը, ինչո՞ւ է Ադրբեջանը դադարեցրել բանակցությունը և գնացել սադրանքի։ Կարելի՞ է ենթադրել, որ հույս չունի, որ բանակցելով կստանա պահանջածը՝ ՀՀ-ն փաստաթղթով ԼՂ-ն չի ճանաչի Ադրբեջանի մաս, միջանցք ու անկլավներ չի տա, շանտաժով է փորձում Բաքուն ստանալ զիջումներ։

Քաղաքական գիտությունների դոկտոր Հրաչյա Արզումանյանը, որ նաև ազգային անվտանգության և ռազմական հարցերով փորձագետ է, մշտապես կասկածով է վերաբերվել ՀՀ իշխանությունների հռչակած նպատակակետին՝ բացել «խաղաղության դարաշրջան»՝ Ադրբեջանի հետ խաղաղության պայմանագիր կնքելով։

«Ի՞նչ նշանակություն ունի՝ լայնածավալ ռազմական գործողություններո՞վ դու կկորցնես Արցախը, Սյունիքը, տեռորիստական մեթոդների արդյունքո՞ւմ կկորցնես, թե՞ բլոկադայով։ Այդ բոլորը ռազմական գործողությունների մեթոդներ են։ Քեզ համար նշանակություն ունի՞, թե ինչ մեթոդով են քեզ սպասնելու։ Սա սխալ մոտեցում է՝ քո դեմ վարում են պատերազմ։ Ռազմական գործողություններ են ծավալվում՝ բլոկադա, դիվերսիաներ, սեպտեմբերի հարձակում, տեռորիստական գործողություններ՝ այս բոլորը պատերազմներ են։ Եվ դու հնարավորություն չունես պատերազմի մեջ չմտնելու և պատերազմը չշարունակելու, կամ էլ պիտի համաձայնվես, որ պարտվել ես։ Պարտությունը նշանակում է այս դեպքում՝ քեզնից ոչ թե տարածք են ուզում վերցնել, այլ պետական ինքնիշխանություն»,- ասաց նա։

Հրաչյա Արզումանյանին հիշեցրինք Նիկոլ Փաշինյանի՝ օրերս արած խոստովանությունը, որ չի երևում զիջման սահմանը, ինչից հետո Ադրբեջանը չի ներկայացնի նոր պահանջներ և հարաբերական կայունություն կլինի։

«Բայց դու պետք է հանձնես ինչ-որ բան, որ հասկանա՞ս դա։ Չի կարելի, վարչապետն իրավունք չունի նման հայտարարություն անել։ Դա ցույց է տալիս, որ ինքը չի հասկանում ընթացող պրոցեսները, դա վտանգավոր է, իհարկե, այդպես է պրոցեսը՝ քեզ հետ խաղաղության պայմանագրի մասին չեն խոսում, այլ կապիտուլյացիայի, որ հանձնես պետականությունդ»,- նշեց քաղաքական գիտությունների դոկտոր Հրաչյա Արզումանյանը։

Հարցազրույցն ամբողջությամբ՝ տեսանյութում։

Ռոբերտ Անանյան