14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
ԱՄՆ ԿՀՎ ղեկավարը եղել է Կիևում և պատմել ՌԴ-ի առաջիկա գործողությունների մասին տվյալներից․ The Washington Post
Քաղաքականություն
20.01.2023 | 18:43
ԱՄՆ Կենտրոնական հետախուզական վարչության (ԿՀՎ) տնօրեն Ուիլյամ Բերնսը Կիևում հանդիպել է Ուկրաինայի նախագահ Վլադիմիր Զելենսկիի հետ։ Այս մասին The Washington Post-ին հայտնել են իրազեկ աղբյուրները, գրում է DW-ի ռուսական ծառայությունը։
Լրատվամիջոցի զրուցակիցների խոսքով՝ հանդիպումը տեղի է ունեցել նախորդ շաբաթվա վերջին։
Բերնսը Ուկրաինայի քաղաքական ու ռազմական ղեկավարությանը ներկայացրել է ԿՀՎ ստացած տեղեկությունները՝ կապված ռազմական գործողությունների հետ, որոնք ՌԴ-ն, ըստ այդ տվյալների, ծրագրել է Ուկրաինայում առաջիկա շաբաթներին։
«Տնօրեն Բերնսն այցելել է Կիև, որտեղ հանդիպել է Ուկրաինայի հետախուզության պաշտոնյաների և նախագահ Զելենսկիի հետ՝ վերահաստատելով մեր շարունակական աջակցությունը ռուսական ագրեսիան հետ մղելու հարցում»,- WP-ն մեջբերում է անանուն ամերիկացի պաշտոնյայի խոսքերը:
Բերնսի նախորդ այցը Կիև տեղի էր ունեցել նոյեմբերի 15-ին, երբ Ուկրաինայի մայրաքաղաքն ու այլ քաղաքներ ենթարկվել էին ռուսական զանգվածային հրթիռակոծության»։
Էմմա Չոբանյան
