15.01.2025 | 13:13
Հայկ Մարությանի թիմը ներկայացնում է տրանսպորտի թանկացման հետ կապված հետագա անելիքները. ՈՒՂԻՂ
ՆԱՏՕ-ի գլխավոր քարտուղարի հատուկ ներկայացուցիչն Ադրբեջանի ԱԳ նախարարի հետ քննարկել է Լաչինի միջանցքի արգելափակումը
Քաղաքականություն
20.01.2023 | 13:41
Ադրբեջանի ԱԳ նախարար Ջեյհուն Բայրամովը նախօրեին Բաքվում ընդունել է Հարավային Կովկասի և Կենտրոնական Ասիայի հարցերով ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինային։ Կողմերը քննարկել են Բաքվի և դաշինքի միջև համագործակցությունը, հայ-ադրբեջանական հարաբերությունների կարգավորումը, ինչպես նաև Լաչինի միջանցքի արգելափակումը։
«Բայրամովը Կոլոմինային տեղեկացրել է նաև Ադրբեջանի և Հայաստանի միջև հարաբերությունների կարգավորման խաղաղ օրակարգ ստեղծելու ուղղությամբ Բաքվի գործողությունների, Հայաստանի կողմից կազմակերպվող «սադրանքների և խաղաղ գործընթացին հասցվող վնասի մասին»»,- ասվում է Ադրբեջանի ԱԳՆ հաղորդագրության մեջ։
Բայրամովը նաև նշել է, թե Լաչինի միջանցքի փակման և Արցախի բնակչության «շրջափակման» վերաբերյալ Ադրբեջանին ուղղված մեղադրանքներն անհիմն են ու հավելել, որ հումանիտար ճգնաժամի մասին մեղադրանքները նույնպես «չեն համապատասխանում իրականությանը»։ Նա նաև հայտարարել է, թե Բաքուն պատրաստ է Հայաստանի հետ նոր հանդիպման՝ բանակցությունների համար։
Ըստ ադրբեջանական կողմի՝ Կոլոմինան էլ մտահոգություն է հայտնել տարածաշրջանում տիրող լարվածության կապակցությամբ, ասել, որ Հարավային Կովկասում խաղաղություն և անվտանգություն հաստատելու համար անհրաժեշտ է շարունակել Ադրբեջանի ու Հայաստանի միջև հարաբերությունների կարգավորման գործընթացը։
Հիշեցնենք, որ Բաքու այցից առաջ Խավիեր Կոլոմինան Երևանում էր։ Այստեղ նա հանդիպել էր տարբեր պաշտոնյաների, այդ թվում՝ վարչապետ Նիկոլ Փաշինյանի, ԱԳ նախարար Արարատ Միրզոյանի ու ՊՆ ղեկավար Սուրեն Պապիկյանի հետ։
Էմմա Չոբանյան
