18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Բայրամովը հայտարարել է, թե Արցախում շրջափակում չկա, և խոսել ՀՀ ու ՌԴ ԱԳ նախարարների հետաձգված հանդիպման շուտափույթ անցկացման մասին
Քաղաքականություն
20.01.2023 | 13:16
Ադրբեջանի ԱԳ նախարար Ջեյհուն Բայրամովն այսօր կրկին անհիմն մեղադրանքներ է հնչեցրել Հայաստանի հասցեին ու հայտարարել, թե ԼՂ-ում որևէ «շրջափակում չկա»։ Լրագրողների հետ զրույցում նա հայտարարել է, որ «Լաչինի ճանապարհին ակցիայի հետ կապված փորձում են ստեղծել շրջափակման տպավորություն»։
«Սա պայմանավորված է նրանով, որ ադրբեջանական կողմն անում է հնարավոր ամեն ինչ, ցուցարարները մտադիր չեն հումանիտար աղետ ստեղծել, կան բոլոր պայմանները մեքենաների անարգել երթևեկության համար: Մենք, որպես պատասխանատու պետություն, տեղեկատվություն ենք տրամադրում ձեռնարկված քայլերի մասին։ Ադրբեջանը պարտավորվում է ապահովել Լաչինի ճանապարհի անվտանգ անցումը»,- ասել է Բայրամովը։
Նա կրկին կեղծիքներ է ներկայացրել, թե, իբր, Հայաստանը խուսափում է խաղաղության բանակցություններից, և հայտարարել է, որ Բաքուն պատրաստ է ՌԴ-ի միջնորդությամբ բանակցությունների։
«Մենք պատրաստ ենք որքան հնարավոր է՝ շուտ անցկացնել Ադրբեջանի, Հայաստանի և Ռուսաստանի արտգործնախարարների հետաձգված եռակողմ հանդիպումը»,- ասել է Բայրամովը՝ նշելով, որ «խաղաղության օրակարգի առաջ մղումը միշտ եղել է Ադրբեջանի նախաձեռնությունը»։
Ադրբեջանի ԱԳ նախարարը, սակայն, չի նշել, թե երբ է Բաքուն պատասխանելու Հայաստանի ներկայացրած առաջարկներին։
Էմմա Չոբանյան
