Ալիևը Դավոսում դարձյալ դժգոհել է Հայաստանից

Ադրբեջանի նախագահ Իլհամ Ալիևը Դավոսի տնտեսական ֆորումի շրջանակներում «Եվրասիական միջին միջանցք. ճանապարհից մինչև մայրուղի» թեմայով պանելային քննարկման ժամանակ հերթական անգամ դժգոհություններ է հնչեցրել Հայաստանի հասցեին։

«Ցավոք, Հայաստանը չի արձագանքել խաղաղության համաձայնագրի ստորագրման մեր առաջարկին, որը կլինի շատ պարզ և հիմնված կլինի միջազգային իրավունքի հիմնարար սկզբունքների վրա։ Հանձնակատար Խանը ակնարկել է այստեղ (Դավոսում) Հայաստանի բացակայության մասին։ Նա ասաց՝ Հարավային Կովկասի երկու երկրներ են ներկա, բայց դրանք առնվազն երեքն են։ Ես գիտեմ, թե ում նկատի ուներ:  Ինչո՞ւ Հայաստանը չկա։ Որովհետև Հայաստանը մերժեց Վրաստանի հետ համագործակցության եռակողմ ձևաչափ սկսելու մեր առաջարկը»,-ասել է Ալիևը՝նշելով, որ բարձր է գնահատում Վրաստանի վարչապետ Իրակլի Ղարիբաշվիլիի ջանքերը՝ ուղղված հայ-ադրբեջանական հարաբերությունների կարգավորմանը։

«Ես բարձր եմ գնահատում իմ ընկեր Իրակլի Ղարիբաշվիլիի ջանքերը, ով կազմակերպել է Ադրբեջանի և Հայաստանի արտգործնախարարների հանդիպումը, որին միացել է վրացի գործընկերը։ Մեր առաջարկն էր Վրաստանում կազմակերպել առաջնորդների հանդիպում, քանի որ Վրաստանը պատմականորեն միշտ եղել է այն վայրը, որտեղ հանդիպել են բոլոր հարևանները։ Բայց Հայաստանը պատրաստ չէ դրան։ Դա հնարավոր ռիսկերից մեկն է։ Եթե ​​կովկասյան երեք երկրները միավորեն իրենց ջանքերը էներգետիկայի, տրանսպորտի, անվտանգության, կայունության, սահմանների սահմանազատման ոլորտում, ապա տարածաշրջանը շատ ավելի անվտանգ կդառնա»,-ասել է Ադրբեջանի նախագահը։

Էմմա Չոբանյան