Պատժե՛լ մեղավորներին, հեռացումները քիչ են․ ինչո՞ւ է զորամասը վառարանի հույսին մնացել․ Գայանե Աբրահամյան․ ՏԵՍԱՆՅՈՒԹ

Զոհվել է 15 զինծառայող, 3-ի վիճակը ծանր է գնահատվում Գեղարքունիքի մարզում տեղակայված զորամասի վաշտի կացարանում բռնկված հրդեհի հետևանքով։ Ըստ Քննչական կոմիտեի՝ հրդեհը բռնկվել է ջեռուցման անվտանգության կանոնների խախտման պատճառով։

Պաշտպանության նախարարն այսօր Կառավարության նիստում ասաց՝ ԳՇ պետի 2022-ի դեկտեմբերի հրամանով արգելված միջոց է օգտագործվել՝ ավտոբենզին։ Նիկոլ Փաշինյանը պատմեց, որ հրդեհը մարել փորձող սպան 5 լիտրանոց տարայից փորձել է բենզինը լցնել բաց կրակի վրա։ Ըստ Փաշինյանի՝ այրվել է ոչ միայն վառարանը, նաև՝ բենզինը։ Հրդեհն անցել է վառել փորձող սպային, որից հետո ինքնապաշտպանական բնազդից ելնելով՝ 5 լիտրանոց բենզինը շպրտվել է զորամասի կացարանի ուղղությամբ, ենթադրաբար՝ ոչ դիտավորյալ։ Քննություն է ընթանում։

«Հանուն հավասար իրավունքների» կենտրոն ՀԿ ղեկավար Գայանե Աբրահամյանը Factor TV-ին տված հարցազրույցում ասում է, որ բացարձակ անընդունելի անփութություն է տեղի ունեցածը․ «Շատ անընդունելի վիճակ է բանակում, և այս դեպքն ամենաշատ զոհեր ունեցածն է խաղաղ պայմաններում կատարվածներից։ Լուրջ և թափանցիկ հետաքննություն պետք է լինի»։

«Բարդա՞կ» բառով նկարագրել տեղի ունեցածը։ Գայանե Աբրահամյանը համաձայն է այդ գնահատականը ողբերգական այս պատահարի վերաբերյալ օգտագործելուն։

«Իրանակում այդ բառն է անգամ մեղմ։ Սա իրականում սարսափելի դեպք է, որը ցույց է տալիս մեր բանակում տեղի ունեցող իրավիճակը, բայց, միևնույն ժամանակ, այստեղ միայն կանոնների խախտման խնդիր չէ։ Ինչո՞ւ պիտի զորամասը վառարանի հույսին լիներ։ Կարծես, նավթ չի եղել, բենզին են օգտագործել։ Ամենատարրական գիտելիքն է հուշում, որ կրակի վրա բենզին լցնել չի կարելի։ Սա նաև մեր կրթության խնդիրն է»,- նշեց «Հանուն հավասար իրավունքների» կենտրոն ՀԿ-ի ղեկավարը։

Հարցազրույցն ամբողջությամբ՝ տեսանյութում։

Ռոբերտ Անանյան