14.11.2024 | 23:29
ՀՀ էկոնոմիկայի փոխնախարարի գլխավորած պատվիրակությունն այցելել է Չաբահար նավահանգիստ
Այս տարի էդվարդ Միրզոյանի անվան պատանի կոմպոզիտորների հոբելյանական մրցույթը կանցկացվի Երևանում և Դիլիջանում
Մշակույթ
19.01.2023 | 13:56
ՀՀ ԿԳՄՍ նախարարության աջակցությամբ Հայաստանի կոմպոզիտորների միության նախաձեռնությամբ մայիսի 10-14-ը կանցկացվի Էդվարդ Միրզոյանի անվան պատանի կոմպոզիտորների հանրապետական 10-րդ մրցույթը․ տեղեկացնում են ՀՀ ԿԳՄՍՆ-ից։
Մրցույթին կարող են մասնակցել մինչև 18 տարեկան հայազգի պատանի ստեղծագործողները:
Այս տարի մրցույթը կանցկացվի երկու փուլով՝ Երևանում և Դիլիջանում:
Մայիսի 12-ից մասնակիցները կհանգրվանեն Դիլիջանի էդվարդ Միրզոյանի անվան կոմպոզիտոների ստեղծագործական տանը: Մրցույթի երկրորդ փուլը և գալա համերգը տեղի կունենան Բեթհովենի անվան համերգասրահում:
Մասնակիցների տեղափոխման, կեցության և սննդի ծախսերը կհոգա նախագծի կազմակերպիչը:
Մրցույթի խորհրդի որոշմամբ՝ նախագիծը կհոգա Արցախի մասնակիցների (նաև Հայաստանում այս պահին ժամանակավորապես բնակություն հաստատած)՝ Դիլիջանում կեցության և սննդի ծախսերը՝ մայիսի 10-ից սկսած:
Արցախի այն շնորհալի երեխաները, որոնք չեն կարողանա առկա ձևաչափով ներկա գտնվել մրցույթին, հնարավորություն կունենան մասնակցելու նախագծին առցանց՝ ներկայացնելով իրենց ստեղծագործությունների տեսագրությունները:
Կրտսեր խմբի (մինչև 13 տարեկան) մասնակիցները պետք է ներկայացնեն 1 մենանվագ ստեղծագործություն՝ ցանկացած գործիքի համար (մինչև 5 րոպե տևողությամբ) և 1 հայալեզու երգ՝ գրված ձայնի և ցանկացած գործիքի համար՝ մինչև 5 րոպե տևողությամբ:
Ավագ խմբի (14-18 տարեկան) մասնակիցները պետք է ներկայացնեն 1 մենանվագ ստեղծագործություն՝ ցանկացած գործիքի համար (մինչև 10 րոպե տևողությամբ) և 1 անսամբլային ստեղծագործություն՝ 2-ից 4 գործիքի համար՝ առավելագույնը 10 րոպե տևողությամբ:
Հայտերի ընդունման վերջնաժամկետը մայիսի 5-ն է:
Մրցույթի մասնակցության համար վճար չի պահանջվում:
Մրցանակային տեղեր զբաղեցրած մասնակիցները կստանան անվանական գավաթներ, իսկ հաղթող մասնակիցները` նաև դրամական պարգև:
Դրամական պարգևներ կստանան նաև մրցանակային տեղեր զբաղեցրած մասնակիցների ուսուցիչները:
Մրցույթի բոլոր մասնակիցները կստանան խրախուսական նվերներ, պատվոգրեր:
Մրցույթի մանրամասներ, մասնակցության համար անհրաժեշտ տեղեկություններ կարելի է ստանալ` գրելով մրցույթի պաշտոնական ֆեյսբուքյան էջին կամ զանգահարելով +374 55 07 07 80 հեռախոսահամարով:
