16.11.2024 | 15:35
Վարչապետ Փաշինյանը շնորհավորել է Ռոբերտ Ամիրխանյանին ծննդյան 85-ամյակի կապակցությամբ
Դատավոր Արուսյակ Ալեքսանյանի կալանավորման ժամկետը երեք ամսով երկարեցվեց
Հասարակություն
18.01.2023 | 17:13
Հակակոռուպցիոն դատարանը՝ նախագահությամբ դատավոր Վահե Դոլմազյանի, քիչ առաջ որոշեց Երևանի ընդհանուր իրավասության դատարանի դատավոր Արուսյակ Ալեքսանյանի կալանավորման ժամկետը երեք ամսով երկարեցնել։
Հիշեցնենք, որ դատավորը մեղադրվում է պաշտոնեական լիազորություններն անցնելու և ակնհայտ անարդար դատական ակտ կայացնելու մեջ։ Նրա հետ միասին մեղադրյալի աթոռին են հայտնվել նաև փաստաբան Էրիկ Ալեքսանյանն ու Թամարա Պետրոսյանը․ վերջինս դատավորի օգնականն էր։ Էրիկ Ալեքսանյանն ու Թամարա Պետրոսյանն, ի տարբերություն դատավորի, ազատության մեջ են։
Քրեական գործի տվյալների համաձայն՝ դատավոր Արուսյակ Ալեքսանյանը գրավի դիմաց ազատ է արձակել քրեական հեղինակություն համարվող, Ֆազ մականունով հայտնի Սերգեյ Գրիգորյանին, և Էրիկ Ալեքսանյանն ու Թարամա Պետրոսյանն այդ հարցում օժանդակել են դատավորին։
Էրիկ Ալեքսանյանը մեղադրանքի վերաբերյալ դիրքորոշում հայտնելիս լրագրողների հետ զրույցում պարզաբանել է, որ, ըստ Արուսյակ Ալեքսանյանի մեղադրանքի՝ վերջինս Սերգեյ Գրիգորյանին գրավի դիմաց ազատ արձակելու միջնորդությունը քննել է՝ չնայած այն հանգամանքին, որ այն վերամակագրված է եղել այլ դատավորի։ Փաստաբանն ասում է, որ Արուսյակ Ալեքսանյանը վերամակագրման մասին տեղյակ չլինելով է քննել միջնորդությունը, հետևաբար՝ հանդիսացել է պատշաճ դատարան, գործել է իր լիազորությունների շրջանակներում, հետևաբար ինքը չէր կարող դատավոր Ալեքսանյանին օժանդակել լիազորություններն անցնելու հարցում։
Արաքս Մամուլյան
