19.02.2026 | 15:10
Հաջիևը հայտարարել է, թե Ռուբեն Վարդանյանի դատավճիռը «ոչ միայն արդարադատության իրականացում է, այլև 30-ամյա հակամարտության ավարտ»
Հեղափոխություն՝ ՀՀԿ-ի գործելակերպում. Հանրապետականը ՏԻՄ-երում նահանջ է գրանցում. ՏԵՍԱՆՅՈՒԹ
Քաղաքականություն
13.06.2018 | 19:20
Հունիսի 10-ին Հայաստանի 6՝ Արագածոտնի, Արարատի, Արմավիրի, Գեղարքունիքի, Լոռու և Կոտայքի մարզերի թվով 18 համայնքներում կայացան ՏԻՄ ընտրություններ: Սրանք առաջին ՏԻՄ ընտրություններն էին «թավշյա հեղափոխությունից» հետո: Եթե ընտրողների աշխուժության առումով որևէ փոփոխություն չկա և ավանդական պասիվություն է՝ ընտրություններին մասնակցեց իրավունք ունեցողների ընդամենը 54 տոկոսը, ապա առաջադրումների առումով պատկերն ուշագրավ է:
Այսպես, համայնքի ղեկավարի 27 թեկնածուից ընդամենը մեկն էր ՀՀԿ-ական, ավագանու 79 թեկնածուից՝ 2-ը:
Կատարվածն իրոք զարմանալի է, քանի որ մինչ այս եղած ՏԻՄ բոլոր ընտրություններում ՀՀԿ-ն մասնակցում էր ակտիվորեն:
Մարտի 11-ին, օրինակ, երբ հեղափոխության հեռավոր շունչ անգամ չկար հանրապետությունում, 20 համայնքներում կայացած ՏԻՄ ընտրություններում համայնքի ղեկավարի 19 թեկնածուից 9-ը հանրապետական էր, ավագանու անդամի 138 թեկնածուներից՝ 62-ը:
Դրանից առաջ՝ 2017թ. նոյեմբերի 5-ին, 69 համայնքում կայացած ՏԻՄ ընտրություններում համայնքապետի 135 թեկնածուներից 67-ը հանրապետական էր, ավագանու անդամի 983 թեկնածուներից՝ 240-ը:
Ու այսքանից հետո ՀՀԿ-ն ընտրությունների է ներկայանում մեկ-երկու թեկնածուով: Սա վկայում է իշխող կուսակցության կտրուկ նահանջի մասին ու բոլորովին հակասում է «ժողովուրդը մեզ է ընտրում» տրամաբանությանը:
Ինչ վերաբերում է մյուս կուսակցություններին, ինչպես երևում է՝ ՀՅԴ-ն և ԲՀԿ-ն նույն դիրքորոշումն են ցուցաբերում, ինչ-որ նախկինում՝ պասիվ են, ընտրովի պաշտոններում սեփական մարդն ունենալու հայտ չեն ներկայացնում:
Տարօրինակ է, բայց այս պահին պասիվ է նաև «Ելք» դաշինքն ընդհանրապես և վարչապետ Նիկոլ Փաշինյանի «Քաղաքացիական պայմանագիրը՝ մասնավորապես»: Հեղափոխության առաջամարտիկ քաղաքական ուժը, ՏԻՄ-երում նշանակովի պաշտոնները տիրապետելով, ընտրովի պաշտոններում դեռ հեղափոխություն չի սկսել:
