Չավուշօղլուն անհեթեթ է որակել Շվեդիայի իշխանությունների որոշումը՝ չհետաքննել Էրդողանի խամաճիկը կախելու ակցիան

Թուրքիայի ԱԳ նախարար Մևլութ Չավուշօղլուն սուր քննադատության է ենթարկել Ստոհկոլմում անցյալ շաբաթ տեղի ունեցած ակցիայի կազմակերպիչներին պատասխանատվության չենթարկելու՝ Շվեդիայի իշխանությունների որոշումը, գրում է Անադոլու գործակալությունը։

Չավուշօղլուն անհեթեթ է անվանել Ստոկհոլմի՝ «իր գործողություններն օրենքի գերակայությամբ արդարացնելու փորձը»։

«Շվեդական դատախազության որոշումը՝ չհետաքննել միջադեպը, չափազանց անհեթեթ է։ Բոլորիս հայտնի է, թե ինչ է նշանակում օրենքի գերակայություն»,- ասել է թուրք նախարարը Իրանի ԱԳ նախարարի հետ մամուլի ասուլիսում։

Նա ընդգծել է, որ սադրանքն իրականացվել է «ահաբեկիչների» կողմից, որոնց դեմ Շվեդիան պարտավորվել է պայքարել Եռակողմ հուշագրի շրջանակում։ Չավուշօղլուի խոսքով՝ Շվեդիայի մայրաքաղաքում PKK-ի կողմնակիցների նշված գործողությունները խոսքի ազատության հետ կապ չունեն և ռասիստական ​​են։

«Դա ռասիզմի և ատելության գործողություն է, որն իր մեջ ներառում է ատելության հիմքով հանցագործություն։ Դա հակասում է համամարդկային արժեքներին և հանցագործություն է՝ համաձայն միջազգային իրավունքի։ Փորձելով մոլորեցնել Թուրքիային Ստոկհոլմում PKK-ի սադրանքի հետ կապված՝ Շվեդիայի իշխանությունները միայն իրենց են խաբում։ Կա՛մ Շվեդիան կդառնա ահաբեկիչների կողմից տեղադրված ականների զոհը, կա՛մ մենք բոլորս առաջ ենք շարժվելու՝ հաշվի առնելով մեր անվտանգության հարցերն ու պարտավորությունների կատարումը, որոնք առկա են հուշագրում։ Այս դեպքում որոշումը Շվեդիայինն է»,- ասել է թուրք նախարարը։

Հավելենք, որ Չավուշօղլուն խոսում է Ստոլհոլմում անցկացված ակցիայի մասին, որի ժամանակ ցուցարարները գլխիվայր կախել էին Թուրքիայի նախագահ Ռեջեփ Թայիփ Էրդողանի խամաճիկը։ Սակայն Շվեդիայի դատական իշխանությունները հայտնել են, որ ցուցարարների գործողություններում անօրինական ոչինչ չկա և հետաքննություն չի լինելու։

Էմմա Չոբանյան