Քաղաքականություն
18.01.2023 | 12:12
Իրանի ու Թուրքիայի ԱԳ նախարարներ Հոսեյն Ամիր Աբդոլահիանն ու Մևլութ Չավուշօղլուն Անկարայում հանդիպումից հետո մամուլի ասուլիսում անդրադարձել են կողմերի համագործակցությանը, գրում է Մեհր գործակալությունը։
«Մենք խոսել ենք քաղաքական, տնտեսական և մշակութային հարցերի մասին, որոնց հիմնական առանցքներից մեկը Իրանի և Թուրքիայի ռազմավարական համագործակցության շեշտադրումն էր։ Առևտրի հարցում իրավիճակը լավ է, սակայն երկու երկրների հնարավորությունների մակարդակին չէ»,-ասել է Աբդոլահիանը։ Նա նաև հայտնել է, որ կողմերը քննարկել են Իրանի նախագահ Էբրահիմ Ռաիսիի՝ Թուրքիա սպասվող այցը։
Կողմերը քննարկել են նաև Ուկրաինայի զարգացումներն ու Աֆղանստանի հարցը։ Աբդոլահիանը խոսել է նաև Կովկասյան տարածաշրջանի հակամարտության մասին և ընդգծել, որ Իրանը չի ընդունի որևէ փոփոխություն տարածաշրջանի աշխարհագրության մեջ։
Էմմա Չոբանյան
