Թուրքիայի քրդամետ ընդդիմադիր կուսակցությունը թուրքական բարձրագույն դատարանից պահանջում է իր լուծարման վարույթները կասեցնել՝ մինչև ընտրություններից հետո

Թուրքիայի քրդամետ Ժողովուրդների դեմոկրատական կուսակցությունը (HDP), որը փակելու գործ է սկսվել, միջնորդություն է ներկայացրել Սահմանադրական դատարան՝ խնդրելով դատարանին ավարտել գործը հունիսին նշանակված խորհրդարանական և նախագահական ընտրություններից հետո, գրում են թուրքական լրատվամիջոցները։

Թուրքիայի գլխավոր դատախազը 2021 թվականի մարտին գործ է հարուցել Թուրքիայի խորհրդարանում ներկայացված երկրորդ ամենամեծ ընդդիմադիր կուսակցության՝ HDP-ի դեմ՝ մեղադրելով նրան արգելված Քուրդիստանի աշխատավորական կուսակցության (PKK) հետ կապերի մեջ։

Կուսակցության Օրենքի ու մարդու իրավունքների հանձնաժողովը դատարանին ուղղված միջնորդության մեջ խնդրել է հետաձգել կուսակցության փակման հետ կապված բոլոր վարույթները հունիսի 18-ից՝ ընտրությունների օրվանից հետո:

«Սահմանադրական դատարանը պետք է դադարեցնի այս գործով բոլոր դատավարությունները»,- Անկարայում կուսակցության կենտրոնակայանում կայացած մամուլի ասուլիսում ասել է HDP-ի համանախագահ Միթհաթ Սանջարը։

Նա նշել է, որ փակման գործն իրենց կուսակցության դեմ չէր լինի, եթե հաշվի առնեին օրենքի համընդհանուր սկզբունքները:

«Սա քաղաքականապես մոտիվացված գործ է։ Նպատակը ժողովրդավարական քաղաքականության վրա ճնշում գործադրելն ու HDP-ն վերացնելն է»,- նշել է Սանջարը։

Գերագույն վերաքննիչ դատարանի գլխավոր դատախազ Բեքիր Շահինն անցյալ շաբաթ վերջնական գործը ներկայացրել էր Սահմանադրական դատարանում, որն էլ որոշում է կայացնելու կուսակցության փակման մասին։ Սահմանադրական դատարանն ունի կուսակցությունը լուծարելու կամ դրա որոշ անդամների քաղաքականությամբ զբաղվելն արգելելու տարբերակ, եթե որոշում կայացնի HDP-ի դեմ։

Կուսակցությունը մեկ ամիս ժամանակ կունենա իր պաշտպանությունը նախապատրաստելու համար, մինչև դատարանը կսկսի գործի քննությանը։ Քաղաքական արգելքը հաստատելու համար 15 հոգանոց հանձնաժողովին անհրաժեշտ է երկու երրորդի մեծամասնությունը:

HDP-ն ակնկալում է, որ գործը կավարտվի «առաջիկա ամիսներին՝ ընտրություններից առաջ»: Գլխավոր դատախազն էլ ասել է, որ դատավճռի կայացման ժամկետը «Սահմանադրական դատարանի հայեցողությամբ է»։

Հունվարի 5-ին էլ Սահմանադրական դատարանը կասեցրել է HDP-ի ֆինանսավորումը ահաբեկչության հետ ենթադրյալ կապերի պատճառով՝ զրկելով կուսակցությանը եկամտի հիմնական աղբյուրից։

Այսպիսով, HDP-ի ապագան կարող է մեծ դեր խաղալ Էրդողանի՝ խորհրդարանական և նախագահական ընտրություններում հաջողության որոշման հարցում։ HDP-ի տասնյակ ներկա և նախկին պաշտոնյաներ ներկայում բանտում են վիճելի մեղադրանքներով, որոնք լարել են Թուրքիայի հարաբերություններն Արևմուտքում իր դաշնակիցների հետ: Ի դեպ, տարբեր երկրներ դատապարտել են կուսակցությունը փակելու՝ թուրքական իշխանությունների ձգտումը։

Էմմա Չոբանյան