01.11.2024 | 14:02
Կոբախիձեն կարծում է, որ ընդդիմությունը ստիպված կլինի աշխատել նոր գումարման խորհրդարանում
ԱՄՆ-ը ԵԱՀԿ Մշտական խորհրդում Ադրբեջանին և ՌԴ-ին կոչ է արել անհապաղ բացել Լաչինի միջանցքը
Քաղաքականություն
17.01.2023 | 16:52
ԵԱՀԿ-ում Հայաստանի կողմից հրավիրված Մշտական խորհրդի հատուկ նիստում ԱՄՆ դեսպան Մայքլ Քարփենթերը հայտարարել է՝ Միացյալ Նահանգները նույնպես լրջորեն անհանգստացած է, որ Լաչինի միջանցքն ավելի քան 30 օր փակ է՝ Լեռնային Ղարաբաղում սննդամթերքի, դեղորայքի և այլ պաշարների խիստ պակասություն առաջացնելով։
«Այս փաստերն անվիճելի են։ Մենք կոչ ենք անում Ադրբեջանին և Ռուսաստանին անհապաղ վերականգնել անխափան տարանցումը՝ պահպանելով նախկինում ստանձնած պարտավորությունները, որոնք հստակորեն ներառում են երաշխիքներ, ինչպես դուք մեջբերեցիք, «Լաչինի միջանցքով երկու ուղղություններով շարժվող մարդկանց, տրանսպորտային միջոցների և բեռների անվտանգության համար»: Լաչինի ճանապարհով մասնավոր և առևտրային երթևեկության շարունակական խափանումը կարող է ծանր մարդասիրական հետևանքներ ունենալ Լեռնային Ղարաբաղում ապրող մարդկանց համար։ Մենք շնորհակալություն ենք հայտնում ԿԽՄԿ-ին կարևոր օգնություն ցուցաբերելու համար և կոչ ենք անում Ադրբեջանին՝ ապահովել այս տարածքում ապրող բնակչության անհատական իրավունքները, անվտանգությունը և բարեկեցությունը: ԵԱՀԿ բոլոր մասնակից պետությունները պարտավոր են պաշտպանել իրենց տարածքում գտնվող անձանց անվտանգությունը՝ անկախ էթնիկ պատկանելությունից»,- ասել է ամերիկացի դիվանագետը։
Նա նշել է, որ կա լայն գործիքակազմ, և այն կարող է օգտագործվել այս հակամարտությունում։
«ԱՄՆ-ը կոչ է անում Ադրբեջանին և Հայաստանին վերսկսել բովանդակային բանակցությունները՝ տարաձայնությունները լուծելու համար։ Համապարփակ խաղաղության համաձայնագիրը միակ ճշմարիտ ուղին է դեպի երկարատև խաղաղություն՝ հիմնված հարաբերությունների կարգավորման և փոխադարձ ճանաչման վրա։ Մենք նաև կոչ ենք անում Ադրբեջանին և Հայաստանին հետաքննել ենթադրյալ վայրագությունները և պատասխանատվության ենթարկել մեղավորներին»,- ասել է Քարփենթերը։
Դիվանագետը հավելել է, որ ԱՄՆ-ը շարունակելու է աշխատել Հայաստանի և Ադրբեջանի հետ երկկողմանի, բազմակողմ գործընկերների միջոցով, ինչպիսին է Եվրամիությունը, և միջազգային կազմակերպությունների միջոցով, ինչպիսին ԵԱՀԿ-ն է, հակամարտության համապարփակ և կայուն կարգավորմանը հասնելու համար:
Էմմա Չոբանյան
