08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Կրեմլը հաստատել է՝ Ռուսաստանում մոբիլիզացիան շարունակվում է
Քաղաքականություն
17.01.2023 | 17:30
Նախագահ Վլադիմիր Պուտինի՝ «մասնակի մոբիլիզացիայի» մասին հրամանը ՌԴ-ում շարունակում է ուժի մեջ մնալ։ Այս մասին ասվում է Պսկովի մարզային ժողովի պատգամավոր Արթուր Գայդուկի՝ ՌԴ նախագահի՝ քաղաքացիների դիմումների հետ աշխատանքի հարցերով աշխատակազմին ուղղված հարցման պատասխանում, փոխանցում է DW-ի ռուսական ծառայությունը։
Փաստաթուղթը հրապարակել է «Յաբլոկո» կուսակցության Պսկովի մասնաճյուղը։ Նոյեմբերի վերջին, այն բանից հետո, երբ ՌԴ իշխանությունները հայտարարեցին զորակոչի ավարտի մասին, Գայդուկը դիմում է հղել Պուտինին՝ մոբիլիզացիան դադարեցնելու մասին հրամանագիր ստորագրելու խնդրանքով։
Ըստ նրա՝ պաշտոնական փաստաթղթի բացակայությունը «ռուսական ընտանիքներում ու աշխատանքային կոլեկտիվներում մտահոգություն է հարուցում, անհանգստության ու բամբասանքների համար հող է նախապատրաստում»։
Նախագահի վարչակազմի պատասխանում ասվում է, որ 2022 թվականի հոկտեմբերի 28-ին «ավարտվել է պահեստազորի քաղաքացիների ծանուցումն ու զորակոչը», մինչդեռ զինկոմիսարիատները շարունակում են զորամասերի համալրումը կամավորների և պայմանագրայինների հաշվին։
«Ռուսաստանի Դաշնության նախագահի 2022 թվականի սեպտեմբերի 21-ի թիվ 657՝ «Ռուսաստանի Դաշնությունում մասնակի մոբիլիզացիա հայտարարելու մասին» հրամանագիրը շարունակվում է ուժի մեջ մնալ»,- ասվում է փաստաթղթում։
Տաթև Ֆռանգյան
