27.06.2026 | 17:23
Իշխան Զաքարյանի հետ հաշտության համաձայնությունը հաստատվել է. պետությանը կվերադարձվի 304,5 մլն դրամ
Պատերազմն Ուկրաինայում ավելի քան 7000 խաղաղ բնակչի կյանք է խլել
Քաղաքականություն
17.01.2023 | 17:01
Ուկրաինայում Ռուսաստանի սանձազերծած ռազմական գործողությունների ժամանակ արդեն ավելի քան 7000 խաղաղ բնակիչ է զոհվել։ Այս մասին ասվում է ՄԱԿ-ի Մարդու իրավունքների գերագույն հանձնակատարի գրասենյակի նոր զեկույցում, փոխանցում է DW-ի ռուսական ծառայությունը։
Քաղաքացիների մեծամասնությունը զոհվել կամ վիրավորվել է պայթուցիկ զենքի կիրառման հետևանքով, ներառյալ ծանր հրետանու և հրթիռային համակարգերի հրթիռակոծումը, ինչպես նաև հրթիռային և օդային հարվածները:
Նշվում է, որ խոսքը միայն փաստաթղթավորված դեպքերի մասին է, իրականում մահացությունների թիվը կարող է բազմապատիկ ավելի լինել, ընդգծվում է փաստաթղթում։ Դեռևս շատ դժվար է տեղեկատվություն ստանալ այն բնակավայրերից, որտեղ տեղի են ունեցել կամ շարունակվում են ամենաթեժ մարտերը, մասնավորապես՝ Մարիուպոլից, Լիսիչանսկից, Սևերոդոնեցկից, Սոլեդարից և Բախմուտից։
ՄԱԿ-ի կողմից հաստատված տվյալների համաձայն՝ անցյալ տարվա փետրվարի 24-ից մինչև 2023 թվականի հունվարի 16-ը Ուկրաինայում զոհվել է 7031 խաղաղ բնակիչ, այդ թվում՝ 433 երեխա։ Վիրավորվել է 11327 խաղաղ բնակիչ, որից 827-ը՝ երեխաներ։
Մահվան դեպքերի ճնշող մեծամասնությունը (ավելի քան 90 տոկոս) արձանագրվել է Ուկրաինայի իշխանությունների կողմից վերահսկվող տարածքներում:
Տաթև Ֆռանգյան
