Քաղաքականություն
16.01.2023 | 21:17Ինչո՞ւ է Արցախի ներքաղաքական կյանքի օրակարգային հարց դարձել նախագահական կամ խորհրդարանական ընտրություններ անցկացնելու հարցը։ Արայիկ Հարությունյանը պատրաստվո՞ւմ է հրաժարական տալ։ Արցախի իշխող «Ազատ հայրենիք-ՔՄԴ» խմբակցության պատգամավոր Արամ Հարությունյանը, որը նաև նախագահի թիմակիցն է, Factor TV-ի հարցազրույցում ասում է, որ կա ընդհանուր լարվածություն և ամեն մի հայտարարություն ստանում է մեծ տարածում․ «Ուզում եմ միանշանակ ասել, որ Արցախում խորհրդարանական կամ նախագահական ընտրությունների օրակարգ չկա, որովհետև լուրջ ռիսկեր կան։ Սա նաև իմ անձնական կարծիքն է, որ կարող ենք լուրջ վտանգների առաջ կանգնել։ Արցախի Սահմանադրության համաձայն՝ նախագահի հրաժարականը ենթադրում է նաև ԱԺ-ի ցրում։ Դա կարող է Ադրբեջանին հարմար պայմաններ բերել, և նա կարողանա խոչընդոտել ընտրությունների անցկացումը։ Դա փաստացի կնշանակի անիշխանություն, և ռիսկը մեծ է»։
Տեղեկություններ են շրջանառվում, որ Արայիկ Հարությունյանի և Ռուբեն Վարդանյանի մեջ կան հակասություններ Ադրբեջանի հետ ուղիղ բանակցել-չբանակցելու հարցով։ Ըստ այդ խոսակցությունների՝ Հարությունյանը կողմ է ուղիղ բանակցելուն և հակված է ավելի լուծումներ գտնելու տարբերակին, իսկ Վարդանյանը դեմ է և ավելի կոշտ դիրքերից է հանդես գալիս, և այսպիսով՝ տարաձայնություններ են առաջ եկել։
Իշխող ուժի պատգամավորն ասում է, որ թե՛ Ռուբեն Վարդանյանը, թե՛ Արայիկ Հարությունյանը պատրաստ են բանակցել Բաքվի հետ, սակայն կառուցողական մթնոլորտում, և եթե վերականգնվի Արցախի բանակցային նախկին դիրքը՝ լիիրավ կողմ դառնա։
Արցախի նախագահն այսօր հանդիպել է Արցախի ԱԺ պատգամավորների հետ։ Արամ Հարությունյանը ևս մասնակցել է դրան, և նա փոխանցեց Արայիկ Հարությունյանի խոսքը, որ սկզբունքային անհամաձայնություն Ռուբեն Վարդանյանի հետ չունի։ Պատգամավորը ենթադրում է, որ տարաձայնություն կարող է լինել կառավարման մոդելի հարցով։
Հարցազրույցն ամբողջությամբ՝ տեսանյութում։
Ռոբերտ Անանյան
