Մարդիկ հաղորդակից են Արցախի շրջափակմանը, պարզապես չգիտեն` ում ետևից գնան. Նարինե Դիլբարյան

«Խիստ դատապարտելի եմ համարում այն պնդումները, թե Հայաստանը չպետք է զբաղվի Արցախի հարցով, այլ միայն Արցախը: Նիկոլ Փաշինյա´ն, եթե դու նոյեմբերի 9-ի փաստաթուղթ ես ստորագրել, կես ճանապարհին ձեռքերդ լվանալու իրավունք չունես: Իսկ Արցախի իշխանությունները ճիշտ դիրքորոշում են որդեգրել` պետք է բանակցել, բայց ոչ ծնկաչոք. դա չի կարող օգուտ բերել»,- Factor TV-ի հետ զրույցում նման տեսակետ է հայտնում լեզվաբան, ԵՊՀ դոցենտ Նարինե Դիլբարյանը:

Նրա խոսքով` հայաստանցիները հաղորդակից են Արցախի շրջափակմանը, սակայն այդ անհանգստությունը չի դառնում հանրային, քանի որ մարդիկ խորապես հիասթափված են քաղաքական բոլոր ուժերից` թե´ իշխանությունից, թե´ ընդդիմությունից, չգիտեն` ում ետևից գնան.

«Մենք չենք հեռացել ազգային ուխտից, բայց բաժանվել ենք կղզյակների, մեզ պատել է անվստահությունը: Պետք է ստեղծվի հանրության վստահությունը վայելող նոր ձևաչափ, այլապես Արցախի անկումը Հայաստանի Հանրապետության անկումն է լինելու»:

Նարինե Դիլբարյանը խոսում է նաև հայրենիքին վրա հասած վտանգի ժամանակ մտավորականների դիրքորոշման մասին.

«Մենք չունենք վճռական մտավորականներ, որոնք կարող են պետք եղած ժամանակ սպիտակ դրոշ բարձրացնել, իսկ հետո` պայքարի դրոշ: Մտավորականության շրջանում առկա է երկու ծայրահեղություն`կա´մ հանձնվողական են, կա´մ երազկոտ»:

Մեր զրուցակցի խոսքով` Հայաստանում և Արցախում պետք է վերջնականապես հաստատվի գործելու ժամանակը, ոչ թե սիրո դատարկ խոստովանությունների. «Պետք է գտնենք իրական դաշնակիցների, ոչ թե առաջնորդվենք առասպելական սերերով»

Մանրամասները` տեսանյութում:

Աննա Բաբաջանյան