17.05.2026 | 16:12
Խափանում մետրոպոլիտենում․ այն կաշխատի մեկ գծանի երկկողմանի երթևեկությամբ
Արարատ Խանդոյանի և ՀՀ կառավարության հաշտեցման հիմքով ՄԻԵԴ-ը հայցը կարճել է. Հայաստանը կփոխհատուցի 4150 եվրո
Հասարակություն
13.01.2023 | 23:10
Մարդու իրավունքների եվրոպական դատարանը «Խանդոյանն ընդդեմ Հայաստանի» հայցը որոշել է հանել գործերի ցանկից՝ կողմերի բարեկամական հաշտեցման հիմքով։
Դիմումատուն «Միայնակ Գայլ» Արայիկ Խանդոյանի եղբայրն է՝ Արարատ Խանդոյանը, որի ներկայացուցիչ Արա Ղարագյոզյանը ստրասբուրգյան դատարան ներկայացված բողոքում նշել էր, որ ՀՀ ներպետական ատյանները խախտել են իր պաշտպանյալի Կոնվենցիայի 5-րդ հոդվածի 3-րդ մասը՝ կալանավորման համար համապատասխան և բավարար պատճառների բացակայության մասին։
«2017 թվականին, երբ Արարատ Խանդոյանը գտնվում էր ապօրինի կալանքկ տակ, ես մի քանի միջնորդություն էի ներկայացրել դատարան՝ խափանման միջոցի փոփոխման մասով, միջնորդել էի նաև կիրառել գրավ և ազատ արձակել նրան։
Դատարանը՝ Մնացական Մարտիրոսյանի նախագահությամբ, նմանօրինակ բոլոր միջնորդություններս մերժել էր, վերաքննիչ բողոքներս ևս ապարդյուն էին, ուստի այլ տարբերակ չէր մնացել, քանի Եվրոպական դատարան դիմելը»,-FactorTV-ի հետ զրույցում ասաց Ղարագյոզյանը։
Արարատ Խանդոյանը ձերբակալվել, ապա կալանավորվել էր 2016 թվականի հուլիսին՝ «Սասնա Ծռեր» խմբավորման կողմից ՊՊԾ գնդի գրավման օրերին։ Ըստ մեղադրանքի` Խորենացի փողոցում, ի պաշտպանություն զինված խմբի անդամների, կազմակերպված հավաքի մասնակից Խանդոյանը բռնություն է գործադրել, ձեռքերով և ոտքերով հարվածել է իրենց ծառայողական պարտականությունները կատարող ոստիկանության աշխատակիցներին, քաշքշել և փորձել է խլել ոստիկանի վահանը.
«Արարատ Խանդոյանին առանց հիմնավորումների կալանավորել և պահում էին ապօրինի կալանքի տակ։ Երբ անձին կալանավորում են, պետք է հիմանավորվի կասկածը, և ապացուցվի, որ անձը կատարել է հանցագործություն, այնինչ այս դեպքով որևէ հիմք չկար։ Խախտվել էր Արարատ Խանդոյանի անձնական անձեռնմխելիության իրավունքը»,- նշում է փաստաբանը։
Վեց տարվա քննության ընթացքում ՄԻԵԴ-ը ստացել է կողմերի ստորագրած բարեկամական կարգավորման հայտարարությունները, որոնց համաձայն՝ դիմումատուն համաձայնել է հրաժարվել Հայաստանի դեմ հայցադիմումի վերաբերյալ հետագա ցանկացած հայցից: Փոխարենը, ՀՀ-ն պարտավորվել է 4150 եվրո փոխհատուցել Խանդոյանին և նրա ներկայացուցչին։
«Դատարանն ի գիտություն է ընդունում կողմերի միջև ձեռք բերված բարեկամական կարգավորումը:
Համոզված է, որ կարգավորումը հիմնված է մարդու իրավունքների հարգանքի վրա, ինչպես սահմանված է Կոնվենցիայով և նրա արձանագրություններով, ուստի որևէ պատճառ չի գտնում հիմնավորելու դիմումի շարունակական քննությունը: Այս պատճառներով Դատարանը միաձայն որոշում է հայցը հանել իր գործերի ցանկից»,- նշվում է ՄԻԵԴ որոշման մեջ։
Նշենք, որ մոտ 1 տարի դատաքննությունից հետո Երևանի ընդհանուր իրավասության դատարանն այս գործով Արարատ Խանդոյանին դատապարտեց 3 տարի 6 ամիս ազատազրկման։
Ռոզա Վարդանյան
