Թուրքիան չի բացառում Հայաստանի հետ երկկողմ առևտրի վերսկսումը․ Անադոլուն մանրամասներ է հայտնել հայ-թուրքական բանակցություններից

Թուրքիայի և Հայաստանի միջև հարաբերությունների կարգավորման գործընթացը շարունակվում է, և Անկարան անկեղծ ջանքեր է գործադրում այդ ուղղությամբ, գրում է Anadolu-ն ՝ հղում անելով Թուրքիայի դիվանագիտական ​​աղբյուրներին։ Ուղիղ մեկ տարի է անցել հայ-թուրքական հարաբերությունների կարգավորման առաջին բանակցություններից։ Այս նախաձեռնությունների շրջանակներում արդեն իսկ արվել են առաջին քայլերը, ինչպիսիք են՝ ուղիղ չվերթների, ուղիղ օդային բեռնափոխադրումներ վերականգնումը։

Ըստ լրատվամիջոցի աղբյուրների՝ հատուկ ներկայացուցիչների բանակցությունների չորրորդ փուլից հետո, որը տեղի ունեցել 2022 թվականի հուլիսի 1-ին, տեղի է ունեցել երկու առանձին հանդիպում՝ Թուրքիայի և Հայաստանի համապատասխան կառույցների ներկայացուցիչների մասնակցությամբ, մեկը սահմանային շրջանում, իսկ երկրորդը «Ալիջան» անցակետում։

Անկարայի աղբյուրները նշել են, որ տեխնիկական աշխատանքները՝ կապված երրորդ երկրների քաղաքացիների ցամաքային սահմանով տարանցման հետ, շարունակվում են։ «Ալիջան» անցակետի տարածքում գտնվող կամրջով վերը նշված կատեգորիայի անձանց անցնելու կարգը կհամակարգվի՝ կախված ենթակառուցվածքի վիճակից։

Աղբյուրները չեն բացառել, որ ապագա բանակցություններում կարող են բարձրացվել մի շարք այլ հարցեր, այդ թվում՝ երկկողմ առևտրի վերսկսումը։

Նշվում է, որ 2022 թվականի հուլիսի 1-ին Վիեննայում կայացած չորրորդ հանդիպմանը երկու կոնկրետ որոշում է կայացվել, այնուհետև կայացել է երկու առանձին հանդիպում՝ կապված այդ որոշումների կատարման հետ։

«Անկարա-Երևան երկխոսությանը ցանկացած արտաքին միջամտություն կարող է բացասաբար ազդել տարածաշրջանի բոլոր գործընթացների վրա, սակայն Անկարան կշարունակի ջանքեր գործադրել ոչ միայն հայ-թուրքական հարաբերությունների հաստատման, այլև երկարաժամկետ խաղաղության և կայունության հաստատման համար։ Մենք կշարունակենք անել այն, ինչ անում ենք, քանի որ մենք անկեղծ ջանքեր ենք գործադրում»,-  ասել է լրատվամիջոցի աղբյուրը։

Ըստ հրապարակման՝ հինգերորդ բանակցությունների ամսաթիվը դեռ որոշված ​​չէ, սակայն մինչ դրա կայացումը անհրաժեշտ է մի շարք փոխադարձ քայլեր ձեռնարկել: Բանակցությունները կանցկացվեն կա՛մ Թուրքիայում, կա՛մ Հայաստանում։

«Մարդիկ սկսել են շփվել և կարող են ազատ տեղաշարժվել: Նորմալացման գործընթացում տեղի ունեցավ մի բան, որը տեսանելի չէ անզեն աչքով։ Եթե ​​նախկինում Թուրքիայի քաղաքացիները հայաստանյան վիզա ստանալու համար դիմում էին Թբիլիսիով, ապա այժմ ամեն ինչ արդեն հասանելի է համացանցում։ Նախկինում հայաստանյան ինտերնետ բովանդակությունը հասանելի չէր Թուրքիայի քաղաքացիներին։ Այսուհետ այն բաց է։ Հյուպատոսական գործերը նույնպես շատ լավ են ընթանում։ Կատարվում են մի շարք մարդասիրական քայլեր, որոնք նույնպես անտեսանելի են անզեն աչքով»,- նշել են աղբյուրները։

Էմմա Չոբանյան