29.10.2026 | 15:37
ՌԴ ԶՈՒ-ն Դնեպրում էլեկտրագնացքի է հարվածել․ զոհվել է 13 մարդ
ՀՀ-ն զորավարժությունների չեղարկման մասին ՀԱՊԿ-ին հայտնել է հունվարի 5-ին. ՊՆ խոսնակ
Քաղաքականություն
11.01.2023 | 20:05
Ինչպես հայտնել է ՀՀ վարչապետը՝ Հայաստանի Հանրապետության Պաշտպանության նախարարությունը, հաշվի առնելով ստեղծված ռազմաքաղաքական իրավիճակը, ՀԱՊԿ «Անքակտելի եղբայրություն 2023» զորավարժության անցկացումը ՀՀ-ում համարել է ոչ նպատակահարմար և այդ մասին հունվարի 5-ին պաշտոնական գրությամբ տեղեկացրել է ՀԱՊԿ Միացյալ շտաբի պետին: Այս մասին Factor.am-ի հետ զրույցում ասաց ՊՆ մամուլի խոսնակ Արամ Թորոսյանը։
«Հունվարի 10-ին ՀԱՊԿ Միացյալ շտաբի մամուլի քարտուղար Վլադիսլավ Շեգրիկովիչը լրատվամիջոցներին հայտնել է, որ ՀԱՊԿ Միացյալ շտաբը ստացել է ՀՀ ՊՆ պաշտոնական գրությունը և դիտարկում է զորավարժությունը ՀԱՊԿ այլ անդամ պետության տարածքում անցկացնելու հարցը»,֊ հավելեց ՊՆ խոսնակը։
Հիշեցնենք՝ ավելի վաղ ՀԱՊԿ մամուլի քարտուղար Վլադիմիր Զայնետդինովը հայտնել էր, որ Հավաքական անվտանգության պայմանագրի կազմակերպության (ՀԱՊԿ) քարտուղարությունը Երևանից պաշտոնական ծանուցում չի ստացել Հայաստանում «Անքակտելի եղբայրություն 2023» զորավարժությունների չեղարկման մասին։
«Պաշտպանության նախարարների խորհրդի և Անվտանգության խորհուրդների քարտուղարների կոմիտեի կողմից հաստատված ՀԱՊԿ հավաքական անվտանգության համակարգի հրամանատարավերահսկիչ մարմինների և ուժերի ու միջոցների համատեղ պատրաստության 2023 թվականի պլանով նախատեսվում է ՀՀ տարածքում «Անքակտելի եղբայրություն 2023» ՀԱՊԿ խաղաղապահ ուժերի զորավարժությունների անցկացումը։ Այս տարի հայկական հողի վրա այս զորավարժությունների անցկացման անհրաժեշտությունն ավելի վաղ հաստատվել էր նաև Երևանում։ Ներկայում ՀԱՊԿ քարտուղարությունը հայկական կողմից պաշտոնական ծանուցում չի ստացել կազմակերպության կողմից սահմանված կարգով այդ զորավարժությունները չեղարկելու մասին»,- նշել էին կազմակերպությունից։
Նարեկ Կիրակոսյան
