Թուրքիայի ընտրություններում երեք ընդդիմադիր գործիչներ հաղթում են Էրդողանին․ հարցում

Թուրքիայի գլխավոր ընդդիմադիր Ժողովրդահանրապետական կուսակցությունից (CHP) Ստամբուլի և Անկարայի քաղաքապետեր Էքրեմ Իմամօղլուն և Մանսուր Յավաշն առաջիկա նախագահական ընտրություններում առաջատար են նախագահ Ռեջեփ Թայիփ Էրդողանի դեմ։ Այս մասին են վկայում ORC Research մասնավոր սոցհարցման արդյունքները, գրում է Duvar-ը։

Ընդդիմադիր մեկ այլ՝ İYİ (Լավ) կուսակցության ղեկավար Մերալ Աքշեները ևս հաղթում է Էրդողանին, մինչդեռ CHP-ի առաջնորդ Քըլըչդարօղլուն մի փոքր հետ է երկրի գործող նախագահից։

Անկարայի քաղաքապետ Մանսուր Յավաշը հարցման արդյունքներով ստացել է ձայների 49,4 տոկոսը, իսկ Էրդողանը՝ ընդամենը 39,8 տոկոս։ 10,8 տոկոսն ասել է, որ չի կողմնորոշվում։ Ստամբուլի քաղաքապետ Էքրեմ Իմամօղլուն ստացել է ձայների 47,0 տոկոսը, Էրդողանը՝ 41,9 տոկոսը։ 11,1 տոկոսն ասել է, որ չի կողմնորոշվել։

Նշենք, որ Էրդողանը 2019 թվականի տեղական ինքնակառավարման մարմինների ընտրություններից հետո հակասությունների մեջ երկու քաղաքապետերի հետ։

Մյուս կողմից, Մերալ Աքշեները ստացել է ձայների 46,3 տոկոսը Էրդողանի դեմ պայքարում, որը ստացել է քվեների 41,7 տոկոսը։ 12 տոկոսն ասել է, որ չի կողմնորոշվել: Իսկ ահա CHP-ի առաջնորդ Քըլըչդարօղլուն հավաքել է ձայների 41,8 տոկոսը, մրցակից Էրդողանը՝ 42,5 տոկոսը։ Այս դեպքում 15,7 տոկոսն ասել է, որ չի կողմնորոշվել։

Թեև լուրեր են շրջանառվում, որ İYİ կուսակցության առաջնորդ Մերալ Աքշեները Քըլըչդարօղլուի փոխարեն կողմ է CHP-ից Ստամբուլի քաղաքապետ Իմամօղլուի թեկնածության առաջադրմանը, CHP-ի որոշ բարձրաստիճան գործիչներ պնդում են, որ Քըլըչդարօղլուն կլինի իրենց թեկնածուն ընդդեմ Էրդողանի: Ինքը՝ Քեմալ Քըլըչդարօղլուն ասել է, որ ընդիմադիր վեցնյակի դաշինքն է ընտրելու նախագահի թեկնածուին, և որ ինքը կընդունի առաջադրվել նախագահի պաշտոնում, եթե վեց առաջնորդները համաձայնեն։

Վեցի դաշինքն ընդգրկում է Ժողովրդահանրապետական կուսակցությունը (CHP), İYİ (Լավ) կուսակցությունը, Ուրախություն (Saadet) կուսակցությունը, Դեմոկրատական կուսակցությունը, DEVA (Ժողովրդավարություն և առաջադիմություն) կուսակցությունը և Ապագա (Gelecek) կուսակցությունը:

Որոշ փորձագետներ նշում են, որ CHP-ից Ստամբուլի քաղաքապետ Էքրեմ Իմամօղլուն կամ Անկարայի քաղաքապետ Մանսուր Յավաշը պետք է առաջադրվեն նախագահական ընտրություններում, քանի որ Քըլըչդարօղլուն չի կարող բավարար քանակությամբ պահպանողական ընտրողների ներգրավել իշխող դաշինքից: Նրանք նաև պնդում են, որ Էրդողանի նախընտրական արշավը կարող է կառուցվել Քըլըչդարօղլուի դեմ։

Ի դեպ, Էրդողանը չի բացառել, որ խորհրդարանական ու նախագահական ընտրությունները, հնարավոր է, նախատեսվածից ավելի վաղ անցկացվեն։

Էմմա Չոբանյան