30.04.2024 | 23:36
Վրաստանում լարված իրավիճակ է. խաղաղ ցուցարարներ, քաղաքական գործիչներ և լրագրողներ են վիրավորում ստացել
Ալիևը հիշեցրել է՝ ռուս խաղաղապահների տեղակայման ժամկետը 2025թ․ ավարտվում է և սպառնացել է Հայաստանին
Քաղաքականություն
11.01.2023 | 13:00
Ադրբեջանի նախագահ Իլհամ Ալիևը տեղական հեռուստալիքների հետ զրույցում դարձյալ Հայաստանին մեղադրել է խաղաղության բանակցությունները տապալելու մեջ։ Նա նշել է, որ ակնկալում էր Հայաստանի հետ խաղաղության պայմանագիր ստորագրել 2022 թվականին։
«Ես անկեղծորեն հուսով էի, որ մինչև տարեվերջ մենք կկարողանանք խաղաղության պայմանագիր կնքել, բայց դա տեղի չունեցավ։ Ինչի՞ է սպասում Հայաստանը: Հավանաբար՝ ինչ-որ աշխարհաքաղաքական փոփոխությունների, հավանաբար՝ այլ բանի, գուցե՝ ինչ-որ մեկը նրան ինչ-որ բան է խոստացել»,- ասել է Ալիևը։
Անդրադառնալով խաղաղության պայմանագրի ստորագրման ժամկետներին՝ նա ասել է, որ պայմանագրի Ադրբեջանի առաջարկը «որոշ ժամանակ սեղանին կլինի», բայց Բաքուն այլևս ակտիվություն չի ցուցաբերի։
«Դե, չի լինի խաղաղության պայմանագիր, պետք էլ չէ։ Մենք այդպես կարող ենք երկար ապրել։ Ինչ կլինի հետո՞․․․ դա հետո կերևա։ Կարծում եմ՝ նրանք կլսեն իմ ուղերձներն ու ճիշտ եզրակացություն կանեն։ Եվ կրկին՝ չեմ ուզում ճնշողի դերում լինել, սակայն ստիպված եմ ևս մեկ անգամ տեղ հասցնել, որ այս տարին վերջին հնարավորությունն է լինելու։ Հետո լինելու է 2024 թվականը, հետո՝ 2025-ին, ավարտվում է Ռուսաստանի խաղաղապահ առաքելության ժամկետը»,- սպառնացել է Ադրբեջանի նախագահը։
Էմմա Չոբանյան
