23.04.2026 | 12:39
Դնեպրին ռուսական հարվածի հետևանքով երկու մարդ է զոհվել
Արցախի նորանշանակ ԱԳ նախարարը կաշխատի Երևանից
Քաղաքականություն
11.01.2023 | 11:16
Արցախի նախագահ Արայիկ Հարությունյանի հրամանագրով ԱՀ արտաքին գործերի նախարար նշանակված Սերգեյ Ղազարյանը Երևանում է և այստեղից է կատարելու իր աշխատանքը: Այս մասին Factor.am-ի հետ զրույցում ասաց ՀՀ-ում ԱՀ մշտական ներկայացուցչության մամուլի խոսնակ Արմինե Հայրապետյանը: Նա ընդգծեց, որ Արցախի մի շարք պաշտոնյաներ այժմ ՀՀ-ից են աշխատում, քանի որ Լաչինի միջանցքի փակ լինելու պատճառով վերադառնալու հնարավորություն չկա: Ղազարյանը մինչ այս զբաղեցնում էր Հայաստանում Արցախի մշտական ներկայացուցչի պաշտոնը: Վերջինիս հետ խոսել չկարողացանք․ խոսնակն ասաց` առցանց ռեժիմով հանդիպման է, բացի այդ՝ խիտ աշխատանքային գրաֆիկի պատճառով առաջիկա օրերին չի պատրաստվում հարցազրույց տալ:
Թե որն է Դավիթ Բաբայանին պաշտոնից ազատելու պատճառը` պաշտոնական պարզաբանում չկա։ Բաբայանից ևս պարզաբանում ստանալ չհաջողվեց․ նա այսօր մեր հեռախոսազանգերին չպատասխանեց:
Վաղը կլրանա Արցախի շրջափակման մեկ ամիսը. մի խումբ ադրբեջանցիներ բնապահպանական կեղծ պատրվակներով փակ են պահում Արցախը Հայաստանին և աշխարհին կապող միակ ճանապարհը, ինչի հետևանքով Արցախում հումանիտար ճգնաժամն օրեցօր խորանում է։
Արփի Հակոբյան
