Քաղաքականություն
10.01.2023 | 20:02Դատաիրավական, իրավապահ համակարգում ՀՀ Կառավարության հերթական նշանակումներն արժանացել են խստագույն քննադատության քաղհասարակության կողմից։ Նիկոլ Փաշինյանի առաջադրմամբ՝ Հայաստանի ներքին գործերի նախարար նշանակվեց ոստիկանապետ Վահե Ղազարյանը: Այն ՀԿ-ները, որոնք ներգրավված էին ոստիկանական համակարգի բարեփոխումներում, դադարեցրին իրենց մասնակցությունն այդ պրոցեսին՝ պնդելով, որ նա բարեփոխումների դեմ դիմադրության առաջամարտիկն էր։
Նիկոլ Փաշինյանը 2018-ի հեղափոխության ժամանակ խոստացել էր իրականացնել դատաիրավական համակարգի վեթինգ, անցումային արդարադատություն։ Քաղհասարակության պահանջներից է եղել լյուստրացիան։ Բայց որոշ կառույցներում դատավորներ նշանակվեցին իշխանությանը լոյալ մարդիկ, անգամ՝ ՔՊ խմբակցության անդամ։
Ժողովրդավարությունն իշխանության ճյուղերի, այդ թվում՝ դատական իշխանության հավասարակշռող վերահսկողությունն է Կառավարության և օրենսդիրի վրա։ Վերահսկողության տակ վերցնելով դատական համակարգը՝ իշխանությունը չի՞ հակասում իր իսկ հռչակած արժեքներին։ «Լրագրողներ հանուն մարդու իրավունքների» ՀԿ ղեկավար, իրավապաշտպան Ժաննա Ալեքսանյանը Factor TV-ին տված հարցազրույցում նշում է, որ այս պրոցեսը Հայաստանում «մեկ մարդու իշխանություն» ստեղծելու մասին է։
«Այս մեկ մարդն ուզում է իր վստահելի անձանցով շրջապատվել։ Սա ավելի շատ նշանակում է, որ ինքն ունի ապահովության զգացումի պակաս։ Օրինակ՝ ԿԸՀ նախագահ նշանակել է իր ենթակա Վահագն Հովակիմյանին, ինչն ամենաշատն է ինձ վրա ազդում։ «Ենթակա» եմ խորհրդանշական կերպով ասում, բայց քանի որ այնտեղ աշխատել եմ, Վահագնին էլ գիտեմ, որ ենթակայի բանով է վերաբերվում Նիկոլ Փաշինյանին։ Ինչո՞ւ ես դու իրեն նշանակում ԿԸՀ նախագահ։ Այսինքն՝ միտում կա կեղծելո՞ւ ընտրությունները։ Ինչո՞ւ ես վստահ այդքան, որ քո քայլերը ճիշտ են։ Քո իջևանցի ընկերոջը պետք է նշանակեի՞ր ՀՀ ՆԳՆ նախարար։ Լա՛վ, դու էս երկրի քաղաքացի ես, չե՞ս ուզում որևէ բան փոխել էս երկրում»,- հարց բարձրացրեց Ժաննա Ալեքսանյանը։
Հարցազրույցն ամբողջությամբ՝ տեսանյութում։
Ռոբերտ Անանյան
