14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Քաղաքական սկանդալ Թուրքիայում․ երկրի ԶՈՒ հրամանատարները ծափահարել են Էրդողանի՝ ընդդիմության առաջնորդին ուղղված քննադատությունից հետո
Քաղաքականություն
10.01.2023 | 23:30
Թուրքիայի նախագահ Ռեջեփ Թայիփ Էրդողանն Ազգային պաշտպանության նախարարությունում ելույթ է ունեցել «Նոր սերնդի փոթորիկ» (Fırtına) հաուբիցների հանձնման արարողության ժամանակ՝ հերթական անգամ թիրախավորելով գլխավոր ընդդիմադիր Ժողովրդահանրապետական կուսակցության (CHP) առաջնորդ Քեմալ Քըլըչդարօղլուին, գրում է Duvar-ը։
«Նրանք գնում են Ամերիկա, Անգլիա, Գերմանիա՝ օգնություն խնդրելով արտաքին տնտեսական հանձնակատարներից։ Մյուս կողմից՝ մենք այս հսկա աշխատանքի արդյունքը շահագործման ենք հանձնում մեր սեփական ինժեներների, մեր աշխատողների հետ՝ տեղական և ազգային մակարդակով»,- ասել է Էրդողանը՝ ակնարկելով Քըլըչդարօղլուի վերջին այցերը նշված երկրներ։
Նշվում է, որ Թուրքիայի զինված ուժերի հրամանատարները ծափահարել են Քըլըչդարօղլուին ուղղված Էրդողանի խոսքերից հետո։
Ընդդիմադիր գործիչն իր հերթին այսօր քննադատել է հրամանատարներին, որոնք ծափահարել են։
«Երեկ ցույց տրվեց, որ պետությունը քայքայվում է։ Զինվորականները ծափահարում էին Էրդողանի ստերին ի պատասխան։ Ես երբեք չեմ ուզում, որ զինվորականներն ինձ ծափահարեն։ Հրամանատարներ, ձեր տեղը ճանաչե՛ք, քաղաքականությունը զինվորի գործը չէ։ Եթե նրանք ցանկանում են ներգրավվել քաղաքականության մեջ, ապա պետք է հանեն սուրբ համազգեստը, միանան Էրդողանին»,- ասել է Քըլըչդարօղլուն իր կուսակցության խորհրդարանական խմբի հետ հանդիպման ժամանակ։
Էմմա Չոբանյան
