Քաղաքականություն
09.01.2023 | 21:32Այսօր Արցախի Օպերատիվ շտաբի նիստից հետո հայտնի դարձավ, որ կներդրվի կտրոնային համակարգ, ինչը հնարավորություն կտա առավելագույնս համաչափ բաշխել առկա պարենային ապրանքները: Խանութների ցուցափեղկերը գրեթե դատարկ են։ Կառավարությունն է պահուստային պաշարից որոշ մթերքներ է բաժանում խանութներին։ Factor TV-ն Արցախի Հանրապետության արտգործնախարար Դավիթ Բաբայանից հետաքրքրվեց՝ Արցախի ղեկավարությունը դիմե՞լ է ռուս խաղաղապահներին, որ նրանք Ստեփանակերտի օդանավակայանն օգտագործելով՝ իրականացնեն Հայաստանից հումանիտար բեռների փոխադրումներ դեպի Արցախ։ Պատերազմից հետո ՌԴ խաղաղապահները հումանիտար բեռներ էին տեղափոխում Արցախ, ինչո՞ւ հիմա չանել նույնը։ Փորձագետներից որոշների գնահատմամբ՝ դժվար է պատկերացնել, որ Ադրբեջանը կվնասի հումանիտար բեռով բեռնված ռուսական օդանավը։ Դավիթ Բաբայանը կարծում է, որ Բաքվի կողմից ռուսական օդանավի չեզոքացումը միանգամայն հնարավոր սցենար է․
«Դժվար չի պատկերացնել, որ Ադրբեջանը կհարվածի ռուսական օդանավին, որովհետև Ադրբեջանը նաև փորձ ունի այդպիսի։ Հիշում ենք, որ 44-օրյա պատերազմի ժամանակ Նախիջևանի կողմից խոցեցին ռուսական ուղղաթիռ։ Նման փորձ ունի նաև Թուրքիան։ Օդանավակայանի փորձարկումը, պարզ է, որ տեխնիկական խնդիր չէ՝ քաղաքական է։ Ադրբեջանը, ըստ ամենայնի, փորձում է խոչընդոտներ ստեղծել, թույլ չտալ, որպեսզի օդանավակայանը գործարկվի»,- ասաց Արցախի արտգործնախարարը։
Դավիթ Բաբայանը թեև շատ կարևոր է համարում օդանավակայանի գործարկումը, սակայն այդուհանդերձ պնդում է՝ դա չի կարող երկարատև լուծում լինել․ անհրաժեշտ է անպայման բացել Լաչինի միջանցքը։
Հարցազրույցն ամբողջությամբ՝ տեսանյութում։
Ռոբերտ Անանյան
