30.11.2024 | 01:27
ՀՀ-ն հետ է կանչել Սիրիայում հումանիտար ականազերծման և բուժաշխատողների մասնագիտական խմբի ողջ անձնակազմին
Ադրբեջանը 2022-ին 145 զինծառայողի կորուստ է ունեցել․ զեկույց
Քաղաքականություն
09.01.2023 | 20:46
Ադրբեջանական բանակը 2022 թվականին 145 ծառայող է կորցրել։ Այս մասին ասվում է Ռազմական հետազոտությունների Կասպյան ինստիտուտի զեկույցում։ Նշվում է, որ 145 զինծառայողից 87-ը մահացել է մարտական պայմաններում, 58-ը՝ ոչ մարտական։ Այս կազմակերպությունը գործում է Գերմանիայում 2015 թվականի փետրվարից ռազմական փորձագետ Ջասուր Սումերինլիի ղեկավարությամբ, որը 2003 թվականից ղեկավարում է Ադրբեջանի լրագրողական ռազմական հետազոտությունների «Դոկտրին» կենտրոնը։ Նշվում է, որ հայկական կողմի հետ ռազմական գործողությունների ընթացքում Ադրբեջանի կորուստների թիվը 87 է, երկու զինծառայող էլ պայթել է ականի վրա։
Ինչ վերաբերում է ոչ մարտական կորուստներին, ապա 11 զինծառայող մահացել է ավտովթարից, 9-ը` հիվանդությունից, 6-ը` ոչ կանոնադրական հարաբերությունների հետևանքով, ևս 6-ը`անհայտ պատճառներից, 4-ը` դժբախտ պատահարներից, իսկ 22 զինծառայող էլ ինքնասպանություն է գործել:
Զեկույցում ասվում է, որ մահացածներից 105-ը ՊՆ-ի ներկայացուցիչ է եղել, 32-ը՝ Պետական սահմանապահ ծառայության, 4-ը՝ Նախիջևանի առանձին համազորային բանակից, 3-ը՝ նախագահի անվտանգության ծառայությունից, մեկական՝ ներքին զորքերից ու ԱԻՆ-ից։
Նշվում է նաև, որ 2022 թվականին տարբեր պատճառներով տուժել և վիրավորվել է 304 զինծառայող։ Ինստիտուտը նաև նշում է, որ 2021 թ-ի հետ համեմատ՝ կորուստների թիվն ավելացել է․ այն ժամանակ եղել է 18 մարտական կորուստ և 66՝ ոչ մարտական։
Էմմա Չոբանյան
