ԱՄՆ-ը կշարունակի համագործակցել Հայաստանի և Ադրբեջանի հետ վերջնական կարգավորման հասնելու համար. Նեդ Փրայս

ԱՄՆ-ը ներգրավված է և իր գործընկերների հետ կշարունակի համագործակցել Ադրբեջանի և Հայաստանի հետ Լեռնային Ղարաբաղի հակամարտությանն առնչվող խնդիրների լուծմանն ուղղված ջանքերում: Այս մասին ճեպազրույցի ժամանակ հայտարարել է ԱՄՆ պետքարտուղարության խոսնակ Նեդ Փրայսը:

-Երբ պետքարտուղար Էնթոնի Բլինքենը Հայաստանի և Ադրբեջանի արտգործնախարարների հետ հանդիպեց այստեղ, Դուք հույս հայտնեցիք, որ նախարարները կրկին կհանդիպեն, նաև ակնկալվում էր, որ մինչև տարեվերջ ինչ-որ համաձայնագիր կստորագրեն։ Նախարարները, սակայն, դեկտեմբերին չհանդիպեցին։ Կա՞ մտավախություն, որ բանակցությունները ոչ մի արդյունք չեն տա, և կողմերը կվերադառնան առճակատման:

-Միացյալ Նահանգները շարունակում է պահպանել իր հանձնառությունը Հարավային Կովկասի տարածաշրջանի անվտանգ, կայուն, ժողովրդավարական, բարգավաճ և խաղաղ ապագայի խթանման հարցում: Մենք շարունակում ենք երկկողմանի համագործակցությունը մեր համախոհ գործընկերների հետ, ինչպիսին է Եվրամիությունը, և միջազգային կազմակերպությունների հետ, ինչպիսին է ԵԱՀԿ-ն՝ դյուրացնելու Ադրբեջանի և Հայաստանի միջև ուղիղ երկխոսությունը՝ Լեռնային Ղարաբաղի հակամարտությանն առնչվող կամ դրանից բխող բոլոր հիմնախնդիրներին լուծումներ գտնելու համար:

Ինչպես գիտեք՝ եղել են դեպքեր, երբ պետքարտուղար Բլինքենը հնարավորություն է ունեցել համախմբելու Հայաստանի և Ադրբեջանի իր գործընկերներին։ Մենք դա արեցինք մեկ անգամ այստեղ՝ Վաշինգտոնում՝ Բլեր Հաուսում, անցյալ տարվա վերջին, ապա Նյու Յորքում՝ սեպտեմբերին ՄԱԿ-ի Գլխավոր վեհաժողովի շրջանակում: Մենք կշարունակենք անել այն, ինչը, մեր գնահատմամբ, լավագույն հեռանկարներն ունի՝ առաջ տանելու անվտանգ, կայուն, ժողովրդավարական, բարգավաճ և խաղաղ Հարավային Կովկասի տարածաշրջանի տեսլականը: Մենք, իհարկե, ցանկանում ենք տեսնել, որ կողմերն իրենք են առաջընթաց գրանցում։ Թե ինչպիսին է լինելու այս հակամարտության համապարփակ լուծումը, մեր որոշելու հարցը չէ: Դա ծանր աշխատանք է, որ կողմերն իրենք պետք է անեն։

-Արդյոք ԱՄՆ-ը նախատեսո՞ւմ է ուժեղացնել իր ջանքերը հիմա, երբ Ռուսաստանի և Բրյուսելի միջնորդական ջանքերը ոչ մի արդյունք չտվեցին:

-Մենք կանոնավոր կերպով ներգրավված ենք և կշարունակենք սերտորեն համագործակցել կողմերի հետ՝ երկկողմ, եռակողմ, ԵԱՀԿ-ի, ինչպես նաև այլ գործընկերների միջոցով, որպեսզի օգնենք հասնել այդ վերջնական վիճակին: