Քաղաքականություն
28.12.2022 | 19:32Արցախն արդեն 17 օր է՝ շրջափակման մեջ է։ Ալիևի բռնապետական ռեժիմը շարունակում է բլոկադայի ենթարկել Արցախը՝ ներկայացնելով զանազան պահանջներ, որոնց թվում, թերևս, ամենամեղմը ԼՂ-ի հանքավայրեր մուտք գործելն ու մոնիթորինգ իրականացնելն է։
Ալիևն ու իր ռեժիմի ներկայացուցիչները չեն թաքցնում ՀՀ-ի սուվերեն տարածքների նկատմամբ հավակնությունները, միջանցքի պահանջը, ինչը չունի իրավական որևէ հիմք։ Հայաստանի հասարակությունը ևս փաստացի գտնվում է անվտանգային մարտահրավերների թիրախում։ ՌԴ-ի ռազմական ներկայությունը բավարար չեղավ՝ ո՛չ Արցախի անվտանգությունը բավարար մակարդակով ապահովելու, ո՛չ էլ ՀՀ տարածքների զավթում թույլ չտալու համար։
Նիկոլ Փաշինյանը Սանկտ-Պետերբուրգում ՌԴ նախագահի առաջ բարձրացրեց ԼՂ-ի անվտանգության հարցը․ «Այժմ ստացվում է, որ Լաչինի միջանցքը չի գտնվում ռուս խաղաղապահների վերահսկողության ներքո, և ցանկանում եմ քննարկել այդ իրավիճակը, թե ինչպիսի տարբերակներ կան»:
Ի՞նչ քննարկեցին՝ մանրամասներ դեռ չեն հրապարակվել։ Իսկ ՀՀ ԱԽ քարտուղարը Առաջին ալիքի եթերում բաց տեքստով խոսեց ՀՀ-ի նկատմամբ եղած սպառնալիքների և ռազմական հարձակումներով ուղեկցվող ճնշումների մասին՝ պահանջում են ոչ միայն միջանցք տալ, այլև նպատակ է դրված ՀՀ-ն Միութենական պետություն մտցնել։
Ինչպե՞ս պետք է Հայաստանը դիմակայի իր անկախությանն ու ինքնիշխանությանն ուղղված սպառնալիքներին, որպեսզի ապահովվի ռազմական անվտանգություն, և Արցախը վերադառնա իր բնականոն կյանքին։
Factor TV-ի տաղավարում հրավիրված քննարկմանը մասնակցում են «Միացյալ Հայաստան» կուսակցության փոխնախագահ Վարդան Խաչատրյանը, «Լուսավոր Հայաստան» կուսակցության փոխնախագահ Գևորգ Գորգիսյանը, քաղաքագետ Գուրգեն Սիմոնյանը, քաղաքական վերլուծաբան Արմեն Հովհաննիսյանը, քաղաքագետ Հարություն Մկրտչյանը։
