Քաղաքականություն
28.12.2022 | 15:01
Դեռևս չկա Ուկրաինայի որևէ խաղաղության պլան, և պլանը, որը հաշվի չի առնում ՌԴ տարածքի այսօրվա իրողություններն ու դրա նոր շրջանները, չի կարող լինել «խաղաղ»։ Այս մասին հայտարարել է ՌԴ նախագահի մամուլի խոսնակ Դմիտրի Պեսկովը, գրում է ՌԻԱ Նովոստին։
Ավելի վաղ հաղորդել էինք, որ The Wall Street Journal-ը, հղում անելով եվրոպական և ուկրաինական դիվանագիտական աղբյուրներին, հայտնել էր, որ նախագահ Վլադիմիր Զելենսկիի թիմն ավարտում է Ուկրաինայի՝ տասը կետից բաղկացած խաղաղության ծրագիրը և մտադիր է այն ներկայացնել փետրվարին՝ Ռուսաստանի ներխուժման տարելիցին։
«Դեռ Ուկրաինայի որևէ խաղաղության պլան չկա, եկեք սկսենք դրանից։ Չի կարող գոյություն ունենալ Ուկրաինայի որևէ խաղաղության ծրագիր, որը հաշվի չի առնի Ռուսաստանի տարածքի հետ կապված այսօրվա իրողությունները, Ռուսաստանի կազմում չորս նոր շրջանների ընդգրկումը։ Որևէ ծրագիր, որը հաշվի չի առնի այս իրողությունները, չի կարող հավակնել, որ «խաղաղ է»»,- ասել է ՌԴ նախագահի մամուլի խոսնակը։
Էմմա Չոբանյան
