02.06.2026 | 12:10
ՌԴ-ն արգելել է ՀՀ-ից կորիզավոր մրգերի ներմուծումը // Խուզարկություններ Արմավիրում․ ԼՈՒՐԵՐ
Բախմուտի ուղղությամբ ռուսական գրոհի թափը նվազել է․ ISW
Քաղաքականություն
28.12.2022 | 12:21
Ուկրաինայի դեմ ռուսական պատերազմի ընթացքի վերաբերյալ իրենց հերթական ամփոփագրում Պատերազմի ուսումնասիրման ամերիկյան ինստիտուտի (ISW) վերլուծաբաններն արձանագրում են, որ Բախմուտի ուղղությամբ գրոհող ռուսական ուժերը մոտենում են իրենց հնարավորությունների գագաթնակետին, գրում է BBC-ի ռուսական ծառայությունը։
Նրանք իրենց եզրակացությունը հիմնավորում են նրանով, որ Բախմուտի ուղղությամբ լուրջ կորուստները ստիպել են ռուսական զորքերին հարձակողական գործողությունների մասշտաբները իջեցնել առանձին ջոկատների մակարդակի։ Ուկրաինայի ԶՈՒ-ի Արևելյան հրամանատարության ներկայացուցիչ գնդապետ Սերգեյ Չերևատին հայտարարել էր, որ ռուսական զորքերը Բախմուտում չեն հարձակվում գումարտակային մարտավարական խմբերով, այլ գործում են 10-15 հոգանոց փոքր ջոկատներով: ISW-ն հիշեցնում է, որ նման բան տեղի է ունեցել օգոստոսին Խերսոնի ուղղությամբ։ Սա վկայում է այն մասին, որ ռուսական բանակն այս ուղղությամբ այլևս ի վիճակի չէ զգալի առաջխաղացում գրանցել մեծ ստորաբաժանումներով։
Ամերիկացի վերլուծաբանների կարծիքով ՌԴ-ն խնդիրներ ունի անձնակազմի ու զինամթերքի հետ կապված, ինչի հետևանքով առաջիկայում դա թույլ չի տա Բախմուտի ուղղությամբ գործողությունների բարձր ինտենսիվություն պահպանել։ Ինստիտուտի փորձագետները նշում են, որ ռուսական առաջխաղացումը Բախմուտի շրջանում կշարունակի դանդաղել կամ ընդհանրապես կանգ կառնի, եթե առաջիկայում այնտեղ գտնվող զորքերը կենդանի ուժի և հրետանային արկերի զգալի համալրում չստանան։
Էմմա Չոբանյան
