Բայրամովը Հայաստանին մեղադրել է, իբր, «ապակառուցողական» լինելու մեջ

Ադրբեջանի ԱԳ նախարար Ջեյհուն Բայրամովը սահմանափակ է համարում 2022 թվականին Հայաստանի հետ բանակցություններում խաղաղության պայմանագրի և սահմանների դելիմիտացիայի հարցում առաջընթացը։ Ադրբեջանական քարոզչական լրատվամիջոցների փոխանցմամբ՝ նա Հայաստանին մեղադրել է, իբր, ապակառուցողական լինելու մեջ։ Փաստորեն, երկիր, որի նախագահը շարունակում է ամեն օր ուժով սպառնալ Արցախին ու տարածքային պահանջներ ներկայացնում ՀՀ-ին, պարբերաբար չի կատարում 2020 թվականի նոյեմբերի 9-ի եռակողմ հայտարարությամբ իր պարտավորությունները, Երևանի հասցեին է անհիմն մեղադրանքներ հնչեցնում։

«Խաղաղության պայմանագրի շուրջ բանակցությունների առաջին փուլը տեղի է ունեցել  Ժնևում, երկրորդը՝ Վաշինգտոնում, երրորդ փուլը չկայացավ հայկական կողմի մերժման պատճառով։ Նաև տեղի է ունեցել սահմանների սահմանազատման համատեղ հանձնաժողովի երեք նիստ։ Ընդհանրապես, ձեռք բերված առաջընթացը խաղաղության պայմանագրի և սահմանների սահմանազատման հարցում շատ սահմանափակ է, պատճառը հայկական կողմի ոչ կառուցողական և անհետևողական դիրքորոշումն է»,- ասել է Բայրամովը 2022 թվականի արդյունքներն ամփոփող մամուլի ասուլիսում։

Նա նշել է, որ «Հայաստանը պետք է կատարի իր պարտավորությունները, իսկ Բաքուն իր կողմից շարունակելու է ջանքերը, որ Հայաստանը դրանք կատարի»։ Ի դեպ, Բայրամովն այդպես էլ չի խոսել այն մասին, թե ինչո՞ւ է Ադրբեջանը շարունակաբար խախտում և չի կատարում սեփական պարտավորությունները, այդ թվում՝ հումանիտար աղետ ստեղծելով Արցախում։

«Ադրբեջանը միշտ բաց է տարբեր հարթակներում երկխոսության համար։ Բայց Հայաստանի հետ բանակցությունների հիմնական նպատակն արդյունքն է»,- ասել է Բայրամովը։

Նա հավելել է, որ Բաքվի համար ընդունելի չեն Ադրբեջանի նկատմամբ կանխակալ մոտեցում ցուցաբերող հարթակները։

Էմմա Չոբանյան