Քաղաքականություն
27.12.2022 | 15:39
Կոսովոյի հետ սահմանին Սերբիայի ԶՈՒ-ն նախագահ Ալեքսանդր Վուչիչի հրամանով բերվել է լիարժեք պատրաստության վիճակի՝ տարածաշրջանում իրավիճակի սրման ֆոնին։ Այս մասին հայտարարել է երկրի պաշտպանության նախարար Միլոշ Վուչևիչը, որը նախօրեին ստուգումներ է անցկացրել մարտական դիրքերում։ Ըստ Բելգրադի՝ նման միջոցներ են ձեռնարկվել Կոսովոյում սերբ ժողովրդին պաշտպանելու համար։
«Ուզում եմ ձեզ տեղեկացնել, որ մենք իսկապես ծանր իրավիճակում ենք, բայց մենք բոլոր ջանքերը կգործադրենք, կանենք ամեն ինչ խաղաղությունն ու կայունությունը պահպանելու համար, և ոչ միայն դա, մենք կպաշտպանենք Կոսովոյում և Մետոհիայում մեր ժողովրդին: Ալբանացիներին զինելուց և նրանց մարտական պատրաստվածության մակարդակը բարձրացնելուն ի պատասխան ես կձեռնարկեմ բոլոր անհրաժեշտ միջոցները մեր ժողովրդին պաշտպանելու, Սերբիան պաշտպանելու համար»,- հայտարարել է Սերբիայի նախագահ Ալեքսանդր Վուչիչ ։
Սերբական ռազմական տեխնիկան Կոսովոյի հետ վարչական սահման է ժամանել երկուշաբթի օրը՝ Զուբին Պոտոկ քաղաքում, որտեղ տեղի էթնիկ սերբերը վերջին երկու շաբաթվա ընթացքում ճանապարհային բարիկադներ են տեղադրել, նախորդ օրը տեղի ունեցած հրաձգության միջադեպից հետո բարձր լարվածության ֆոնին: Կոսովոյում ՆԱՏՕ-ի գլխավորած խաղաղապահները հայտարարել են, որ հետաքննում են միջադեպի հանգամանքները:
Ավելի վաղ, ըստ սերբական լրատվամիջոցների, Կոսովոյի իշխանություններն իրենց զինված ուժերը բերել էին լիակատար պատրաստության՝ նախապատրաստվելով բարիկադների ապամոնտաժման գործողությանին։ Կիրակի օրը Մեծ Բրիտանիայի, Գերմանիայի, Իտալիայի, ԱՄՆ-ի և Ֆրանսիայի դեսպանները Սերբիայի նախագահից պահանջել են հասնել բարիկադների ապամոնտաժմանը՝ սպառնալով, որ հակառակ դեպքում նրանք չեն միջամտի Կոսովոյի վարչապետ Ալբին Կուրտիի՝ իրավիճակը կարգավորելու փորձերին, որն ընդգծել էր, որ տարածաշրջանի հյուսիսում բարիկադների վերացումը «չի կարող բացառել զոհերը»։
Սերբիայի և Կոսովոյի միջև լարվածությունը սրվել է վերջին երկու շաբաթվա ընթացքում այն բանից հետո, երբ տեղի սերբերը փակել են երկրի հյուսիսում գտնվող գլխավոր ճանապարհները՝ ի նշան բողոքի ազգույթամբ սերբ նախկին ոստիկանի ձերբակալության դեմ:
Տաթև Ֆռանգյան
