Քաղաքականություն
27.12.2022 | 11:50
Ֆրանսիական «Le Figaro» պարբերականի փոխտնօրեն Ժան-Քրիստոֆ Բուիսոնը թվիթերի իր միկրոբլոգում արված գրառմամբ տեղեկացրել է, որ Լաչինի միջանցքում ադրբեջանցիների շրջափակմանը միանալու ցանկություն են հայտնել պակիստանցի «ուսանողներ»։
«Արցախում հայերի համար վատ լուրեր են կուտակվում. երեկ՝ դեկտեմբերի 26-ին, ռուսները ոչ միայն չեն ազատել Լաչինի միջանցքը, այլև պակիստանցի խորհրդավոր «ուսանողներ» հայտարարել են, որ ցանկանում են միանալ ադրբեջանցի ակտիվիստներին՝ ուժեղացնելու շրջափակումը»,- գրել է Բուիսոնը։
Հիշեցնենք՝ կեղծ բնապահպանական պատրվակներ ներկայացնելով՝ մի խումբ ադրբեջանցիներ Լաչինի միջանցքը փակ են պահում արդեն 16 օր։ Արցախը Հայաստանին կապող միակ ճանապարհի փակ լինելը հումանիտար խնդիրների պատճառ է դարձել․ Ստեփանակերտում նկատվում է սննդի, դեղորայքի, վառելիքի պակաս, ավելի քան 1000 արցախցիներ՝ այդ թվում երեխաներ, չեն կարողանում ՀՀ-ից վերադառնալ իրենց բնակավայրեր։
Անահիտ Խաչատրյան
