20.04.2026 | 21:09
Վենսը երեքշաբթի կմեկնի Վաշինգտոնից` Պակիստանում Իրանի հետ բանակցությունների մասնակցելու համար. CNN
Հաստատվեց Գյումրիի բյուջեն․ դոտացիան կրճատել են 248 միլիոն դրամով
Քաղաքականություն
26.12.2022 | 21:49
Այսօր Գյումրիի ավագանին հաստատեց քաղաքի 2023 թվականի բյուջեն, որի եկամուտները կկազմեն 4 միլիարդ 491, 4 միլիոն դրամ, ծախսերը հավասարազոր են, իսկ դոտացիան կկազմի 2 միլիարդ 588,5 միլիոն դրամ։ Ըստ Գյումրու քաղաքապետի ֆինանսական գծով խորհրդական Լենա Ջիլավյանի՝ դոտացիան կրճատել են 248 միլիոն դրամով։ Ջիլավյանը բյուջեն ներկայացնելիս հայտարարեց, որ այն հավասարկշռված է՝ եկամուտները և ծախսերը հիմնավոր են։
«Ծախսերը և եկամուտները կազմելու ժամանակ հիմք ենք ընդունել անցած մոտակա տարիների փաստացի տվյալները։ Մեր բյուջեն կանխատեսվող է և, անպայման, փետրվարի վերջին կներկայացնենք որոշակի ճշտված բյուջեն, որտեղ կլինեն մեր ազատ միջոցները տարվա ընթացքում օգտագործելու համար։
Փաստացի մենք ունենք պարտքեր, այս տարին փակում ենք պարտքերով։ Դրանք հիմնականում կոմունալ ծախսերն են։ ՀՈԱԿ-ներից հաշվի ֆակտուրաները պետք է ստանանք հունվարի 15-ից հետո, կարգն է այդպես։ Վճարելով գազի, լույսի, ջրի վարձերը՝ մենք պատրաստի թիվ կունենանք, թե մեզ ինչքան գումար կմնա որպես ազատ միջոց, որպեսզի կարողանանք ծախսել քաղաքի լրացուցիչ նպատակների համար։
Բյուջեն բաղկացած է երկու մասից՝ ֆոնդային և վարչական։ Ֆոնդայինը մեր կապիտալ հնարավորություններին է վերաբերում, ֆոնդային միջոցները լրիվ այլ են, մեր հիմնական միջոցների օտարումից ստացած եկամուտներն են, և ծախսերը պետք է պարտադիր կատարվեն։ Իսկ վարչականը մեր սեփական եկամուտների մուտքերն են, և ծախսերը կատարվում են ընդհանուր դրույթներով։
Այս տարի մեր դոտացիան կրճատել են։ 2022 թվականին 2 միլիարդ 796 հազար դրամ, իսկ գալիք տարվա ՝ 2023 թվականի համար 2 միլիարդ 588,5 միլիոն դրամ է։ Մենք համամասնորեն սեփական եկամուտներին գումարելով՝ գումարը բաշխել ենք ամենակարևոր ծախսերի ուղղությամբ»,- ասաց Լենա Ջիլավյանը։
Նա նշեց, որ մշակույթի ոլորտին նախատեսել են հատկացնել 586,6 միլիոն դրամ, թանգարաններին՝ 76,9 միլիոն դրամ, որից 18,5 միլիոնը՝ նվիրատվություններ, սպորտին՝ 617, 6 միլիոն դրամ, որի մեջ մտնում են գործուղումները և նվիրատվությունները. Ասֆալտապատման աշխատանքնեռի համար կծախսվի 160 միլիոն դրամ։
Արմիկ Մովսիսյան
