Քանի՞ միլիոն է հատկացրել Սերժ Սարգսյանի եղբոր հիմնադրամին «Երևան» հիմնադրամը, որը պատրաստում են լուծարել

Երևանի քաղաքապետարանը որոշել է լուծարել ոչ թափանցիկ աշխատող, մշտապես մամուլի ուշադրության կենտրոնում հայտնված «Երևան» հիմնադրամի գործունեությունը։

Այս մասին այսօր ֆեյսբուքյան իր էջում գրել է ԿԳ նախարար Արայիկ Հարությունյանը․ «Հիշու՞մ եք, որ ամիսներ առաջ Լենա Նազարյանը և ես դատի էինք տվել «Երևան» հիմնադրամին մեզ անհրաժեշտ տեղեկություններ չտրամադրելու համար: Հիմնադրամի հոգաբարձուների խորհրդի նախագահը Տարոն Մարգարյանն է: Մեր ունեցած տեղեկություններով, այստեղ կարող էին լինել կոռուպցիոն սխեմաներ: Տեղեկությունների հավաստիությունը ստուգելու համար դիմել էինք դատարան, որի առաջին նիստը կկայանա հունիսի վերջին:

Ու ի՞նչ եմ իմանում երեկ. առաջիկա ավագանու նիստում քննարկվելու է հիմնադրամի լուծարման հարցը: Բայց դե հինադրամ փակելով հետքերը դժվար է մաքրել:

Հ.Գ. դատարանին նաև կմիջնորդենք կասեցնել լուծարումը մինչև անհրաժեշտ տեղեկատվությունը տրամադրվի»:

Նշենք, որ «Երևան» հիմնադրամը, որի հոգաբարձուների խորհրդի անդամ է քաղաքապետ Տարոն Մարգարյանը, ակտիվ համագործակցության մեջ է «Փյունիկ» հիմնադրամի հետ: Վերջինիս հոգաբարձուների նախագահն է ՀՀ պաշտոնաթող նախագահ, նախկին վարչապետ Սերժ Սարգսյանի եղբայրը՝ Լևոն Սարգսյանը։

Factor.am-ին «Փյունիկ հիմնադրամի 2016 թվականի հաշվետվության ուսումնասիրությունից պարզ է դառնում, որ, օրինակ, «Փյունիկ» հիմնադրամին  «Երևան» հիմնադրամից 2016 թվականին փոխանցվել է 199,555,330 հազ. դրամ՝ սիզամարգերի ստեղծման և ծաղկապատման համար, 400,000 մլն դրամ՝ բակերում խաղահրապարակների հիմնանորոգման և պահպանման համար։ 

Իսկ ահա «Երևան» հիմնադրամի 2017 թվականի հաշվետվության ուսումնասիրությունից պարզ է դառնում, որ անհատներից և կազմակերպություններից հիմնադրամին փոխանցվել է 1,370, 811, 149 հազ. դրամ գումար։ Կանաչապատման, տոնական, մշակութային միջոցառումների համար՝ 550 մլն 744 հազար 427 դրամ, ՀՀ պետական բյուջեից՝ 20 մլն դրամ՝ բարձրահարկ բազմաբնակարան շենքերի գազիֆիկացման համար:  

Թե ինչու է որոշել Երևանի քաղաքապետրանը լուծարել այս հիմնադրամը, ինչ մութ պատմություն է թաքնված այս որոշման հետևում,  պարզ կլինի ավելի ուշ։