21.03.2026 | 20:02
ԱՄՆ-ի Հավայի նահանգում 5,5 հազար մարդ կտարհանվի ջրհեղեղի պատճառով
Ի՞նչ են քննարկել Լավրովն ու Բայրամովն առանց Միրզոյանի․ մանրամասներ Մոսկվայից․ ՏԵՍԱՆՅՈւԹ
Քաղաքականություն
23.12.2022 | 20:40
Մոսկվայում այսօր Ռուսաստանի և Ադրբեջանի ԱԳ նախարարներն առանց Հայաստանի մասնակցության երկկողմ բանակցություններ են վարել։ Հայաստանի արտաքին քաղաքական գերատեսչությունից երեկ հայտնեցին, որ հայկական կողմը խնդրել է հետաձգել այսօր նախատեսված Լավրով-Միրզոյան-Բայրամով եռակողմ հանդիպումը: ԱԳՆ-ից հիմնավորել էին՝ այս պահին Հայաստանի արտաքին գործերի նախարարի առաջնահերթությունն արդեն 11 օր փակ պահվող Լաչինի միջանցքի անխոչընդոտ վերագործարկման և Լեռնային Ղարաբաղում հումանիտար ճգնաժամի արդյունքում ստեղծված խնդիրների հասցեագրումն է:
ԱԺ ընդդիմադիր «Պատիվ ունեմ» խմբակցության պատգամավոր Տիգրան Աբրահամյանը դժվարանում է ասել՝ Մոսկվայում եռակողմ հանդիպումից հրաժարվելու՝ Հայաստանի ԱԳ նախարարության որոշումը ճի՞շտ էր, թե՞ ոչ։
Երեկ Հայաստանի վարչապետը նաև հայտնեց, որ Բաքվին են փոխանցել խաղաղության պայմանագրի իրենց առաջարկները և սպասում են արձագանքի։ Եթե Ադրբեջանը դրական արձագանքի, Հայաստանը պատրաստ է մինչև տարեվերջ խաղաղության պայմանագիր ստորագրել։ Լաչինի միջանցքը փակ է արդեն 12 օր, և այս ֆոնին Հայաստանի արտաքին գործերի նախարարը զբաղված է այդ հարցով, այլ հանդիպումների հնարավորություն չկա։
Ընդդիմադիր պատգամավոր Տիգրան Աբրահամյանը, մինչդեռ, շեշտում է՝ Ադրբեջանից հնչող հայտարարությունները ցույց են տալիս, որ, ըստ էության, չկա խաղաղության օրակարգ, և այս ֆոնին իշխանական պաշտոնյաների հայտարարությունները խաղաղության պայմանագիր ստորագրելու պատրաստակամության մասին, ըստ պատգամավորի, առնվազն տարակուսելի են։
Ինչ վերաբերում է այսօրվա այդպես էլ տեղի չունեցած եռակողմ հանդիպման ընթացքում Հայաստանին հնարավոր զիջումներ պարտադրելու՝ ընդդիմադիր պատգամավորի կասկածներին, ապա իշխանական պատգամավոր Սարգիս Խանդանյանը դժվարանում է ասել՝ Լաչինում տեղի ունեցողի ֆոնին Մոսկվայում ինչպես կընթանային բանակցությունները։
Այդուհանդերձ, չնայած հայկական կողմի՝ հանդիպմանը մասնակցությունից հրաժարվելուն, Մոսկվայում Բայրամովն ու Լավրովը քննարկում ունեցել են։ Հանդիպումից հետո Լավրովը դժգոհել է, թե Հայաստանը դիվանագիտական որևէ խողովակ չի օգտագործել՝ Մոսկվային տեղեկացնելու եռակողմ հանդիպմանը մասնակցելուց հրաժարվելու մասին, և այդ մասին իմացել են մամուլի ծառայությունից։ Լավրովը նաև խոսել է Լաչինում ստեղծված իրավիճակից։
Բայրամովն էլ իր հերթին դժգոհել է Արցախում Ռուբեն Վարդանյանի ներկայությունից։ Ավելի քան մեկ ամիս առաջ էլ Ալիևն էր հայտարարել, թե Բաքուն Հայաստանի ճակատագիրը չի քննարկի ոչ միայն Հայաստանի, այլ նաև, Ալիևի ձևակերպմամբ, Մոսկվայից ուղարկված Ռուբեն Վարդանյանի հետ։
Այսօր Լավրովը, ի պատասխան Արցախից Ռուբեն Վարդանյանի հեռանալու մասին Բայրամովի պահանջի, պնդել է, թե Ռուբեն Վարդանյանը Ռուսաստանի հետ որևէ կապ չունի, քանի որ նա այլևս ՌԴ քաղաքացի չէ։
Մանրամասները՝ տեսանյութում։
Շողիկ Գալստյան
