«Ռուս խաղաղապահներն աշխատում են Լաչինի միջանցքում իրավիճակի կարգավորման համար»․ Լավրովը՝ Բայրամովի հետ բանակցություներից հետո

Ռուս խաղաղապահները ամեն ժամ աշխատում են Լաչինի միջանցքում ստեղծված իրավիճակը կարգավորելու համար և կապի մեջ են կողմերի հետ։ Այս մասին հայտարարել է ՌԴ ԱԳ նախարար Սերգեյ Լավրովը Ադրբեջանի ԱԳ նախարար Ջեյհուն Բայրամովի հետ բանակցություններից հետո կայացած մամուլի ասուլիսում, գրում է ՏԱՍՍ-ը։

«Իհարկե, մենք դիտարկել ենք այն իրավիճակը, որն այժմ ամենամեծ հետաքրքրությունն է ներկայացնում՝ իրավիճակի սրումը Լաչինի միջանցքում: Մենք հաստատեցինք, որ ռուս խաղաղապահներն աշխատում են բառացիորեն ամեն ժամ՝ համապատասխան կողմերի հետ շփումներում իրավիճակը կարգավորելու համար»,- ասել է Լավրովը։

«Մենք հանդես ենք գալիս այն բանի օգտին, որ որքան հնարավոր է շուտ վերականգնվի ամբողջական տրանսպորտային հաղորդակցությունը և լուծվեն տարածաշրջանի հանքավայրերի շահագործման տարաձայնությունները։ Թեման հին է, որը գալիս է դեռ Խորհրդային Միությունից և, իհարկե, անհրաժեշտ է, որքան հնարավոր է շուտ հեռացվի դրա սրությունը»,- հայտարարել է ՌԴ արտգործնախարարը։

Լավրովը նաև ասել է, որ  Ռուսաստանը, ինչպես ոչ ոք, շահագրգռված է Հայաստանի և Ադրբեջանի միջև կայուն և արդար խաղաղությամբ և հակամարտությունների կանխմամբ։ ՌԴ արտաքին գերատեսչության ղեկավարը նաև հայտարարել է, որ «3+3» ձևաչափի մասնակիցները համաձայնեցնում են նոր շփումները նախարարական մակարդակով։

«Այսօր արդեն նախարարների մակարդակով հանդիպում ենք նախապատրաստում։ Նման շփման նպատակահարմարության ըմբռնում կա, մենք պայմանավորվում ենք ժամկետների և կոնկրետ վայրերի շուրջ, որտեղ կարող է նման հանդիպում կայանալ»,- ասել է ՌԴ դիվանագիտական ​​գերատեսչության ղեկավարը։ Նրա խոսքով՝ Ռուսաստանի, Հայաստանի և Ադրբեջանի եռակողմ հանդիպումը հանված չէ օրակարգից, և Ռուսաստանի Դաշնությունը պատրաստ է ընդունել այն։

Հիշեցնենք՝ երեկ ՀՀ ԱԳ-ն հայտնել էր, որ Լաչինում ստեղծված իրավիճակի առնչությամբ հայկական կողմի խնդրանքով հետաձգվել է Մոսկվայում դեկտեմբերի 23-ին, այսինքն՝ այսօր նախատեսված եռակողմ հանդիպումը ՀՀ, ՌԴ և Ադրբեջանի արտգործնախարարների միջև։

Էմմա Չոբանյան